भांगरभूंय | प्रतिनिधी
मॉविना वांगडा बसका; डिजिटल प्लॅटफॉर्माचेर येवपाचें मान्य
भांगरभूंय । प्रतिनिधी
मुरगांव गोंयांत सध्या चालू आशिल्ल्या टॅक्सी वेवसायिकांच्या वादाचेर उपाय मेळपाचीं चिन्नां निर्माण जाल्या. शेनवारा रातीं वास्को येरादारी मंत्री गुदिन्हो हांचे वांगडा टॅक्सी वेवसायीक संघटणांची बसका जाली. टॅक्सी अॅग्रिगेटर अॅपाक आशिल्लो विरोध एक वेळ मान्य जातलो, पूण टॅक्सी वेवसायिकांक वेवसाया खातीर डिजिटल प्लॅटफॉर्माचेर येवचेंच पडटलें अशें मत येरादारी मंत्री मॉवीन गुदिन्हो हांणी उक्तायलें. ह्या मताक टॅक्सी वेवसायिकांनी हयकार दिलो. अॅग्रिगेटर धोरण अजून अंतीम जावंक ना. ताचे विशीं फुडें विचार विनिमय करतले. खोलायेन चर्चा सहज जावची हे खातीर गोंयभरांतल्या सगळ्या संघटणांनी एके सामान्य माचयेर येवची, अशी मंत्र्यान परतून विनवणी केली.
टॅक्सी चालकांच्या घुस्पागोंदळाची समस्या सुटावी करपाच्या उद्देशान कॅब चालकांच्या शिश्टमंडळान शेनवारा येरादारी मंत्री गुदिन्हो हांची भेट घेतली. तांणी मंत्र्यां कडेन येरादारी अॅग्रिगेटर मार्गदर्शक तत्वांच्या मसुद्यांचेर चर्चा केली.
वास्को नवेवाडे वाठारांतल्या मंत्री गुदिन्हो हांच्या कार्यालयांत जाल्ले बसके उपरांत दक्षीण गोंय टॅक्सी युनियनाचे अध्यक्ष सुनील नायक हांणी सांगलें, आमचे नवे संघटणेची स्थापना केले उपरांत येरादारी मंत्र्यां वांगडी आमची ही पयली उपचारीक बसका आशिल्ली. आमी आमच्यो सगलो हुस्को आनी सुचोवण्यो मंत्र्यां मुखार मांडल्यो आनी तांणी आमचें म्हणणें आयकलें.
उत्तर गोंय युनियन फुडारी सावियो गोयस हांणी सांगलें, टॅक्सी वेवसाय हो पिळग्यान पिळग्यो चलत आयिल्लो परंपरीक गोंयचें पोट भरपाचें साधन आसा. आमचें हीत सांबाळपाची आमी मंत्र्या कडेन विनवणी केल्या.
डिजिटल तंत्रज्ञान परिवर्तनाचें म्हत्व सांगतना गुदिन्हो हांणी सांगलें, टॅक्सी ऑपरेटरांनी विस्वास दवरपाक सुरवात करपाक जाय. ताका लागून तांच्या वेवसायाचें लुकसाण जावचें ना, वयल्यान नव्यो संदी उपलब्ध जातल्यो. आमकां असी प्रणाली तयार करपाची आसा, जंय तंत्रज्ञान पर्यटकांक आनी थळाव्यांक लेगीत टॅक्सी सहजतायेन सोदपाक मजत करतली. डिजिटल प्लॅटफॉर्म फायद्याचो थारतलो, हाचेर ऑपरेटरांनी सहमती दाखयली. सरकार डिजिटल प्लॅटफॉर्म धोरणा विशीं न्यायालयाक म्हायती दितलें, जें शुल्का प्रमाण आपचलीत भाडें अधुसुचीत करतलें आनी मोबायल फोना वरवीं उपलब्ध आसतलें. तांणी डिजिटल प्रणाली लागू जाय मेरेन डिजिटल मिटराचे सक्तीचें फिटमेंट आनी नुतनीकरण खर्चांतल्यान तात्पुरती सवलत दिवपाचो प्रस्ताव लेगीत मांडलो. आपणे टॅक्सी ऑपरेटरांक सांगलां, आमी तांच्या वेवसायाक आदार दिवपी आनी लोकांची कार्यक्षमतेन सेवा करपी धोरण तयार करचे खातीर एकवटान काम करुंया. एकमत आनी सकारात्मकतेन फुडें वचपा खातीर आनीक बसका जातल्यो, अशेंय गुदिन्हो हांणी सांगलें.
बसका फळादीक : येरादारी मंत्री
व्यापक चर्चे बगर कसलेंच धोरण लागू करपाची सरकाराक गडबड ना. टॅक्सी संघटणांनी तांच्यो सुचोवण्यो आनी समस्या मांडल्यात. बसका सकारात्मक पद्दतीन सोंपली, हाची आपल्याक खोस जाता. टॅक्सी संघटणां वांगडा जाल्ली बसका खुबूच फळादीक जाली, असो तांणी दावो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
