भांगरभूंय | प्रतिनिधी
देवस्थान समिती : दिवचल मामलेदारान अधिकाराचो गैरवापर केल्ल्याचो आरोप
भांगरभूंय । प्रतिनिधी
सांखळी : सांखळेच्या दत्त मंदिरांतलें गाजिल्लें मुर्ती चोरी प्रकरण हें ह्याच देवळांतल्या कांय म्हाजनांनी रचिल्लें कारस्थान आसा. पाटले समितीन ह्यो मुर्ती विसर्जीत करपाचो घेतिल्लो निर्णय पडून उरिल्लो, हे खातीर आमी तो वावर पुराय केलो. देवाचो प्रसाद घेवन शास्त्रा प्रमाण विसर्जन केलां. तातूंत कसलोच चोरयेचो प्रकार ना. ह्या प्रकरणांत दिवचल मामलेदारान आपल्या अधिकाराचो पुराय गैरवापर केला. ताचे आड मुख्य सचीव, उत्तर गोंय जिल्होदिकारी आनी हेर यंत्रणां कडेन खटलो दाखल करतले, अशें देवस्थान समितीच्या पदाधिकाऱ्यांनी देवस्थान कार्यालयांत घेतिल्ले पत्रकार परिशदेंत सांगलें.
हे पत्रकार परिशदेक सचीव गजानन भट गांवकार, मुखत्यार श्याम बोडके, भांडारी विठ्ठल सामंत, सल्लागार वांगडी दिपेश कामत, अॅड. निहाल कामत, अॅड. शर्मद बोडके, सल्लागार समिती वांगडी नरसिंह भटगांवकार. नागेश दाबोलकार, संजय बोडके उपस्थीत आशिल्ले.
मजगतीं, ह्या प्रकरणांत देवस्थान समितीच्या खंयच्याच पदाधिकाऱ्याचो हात ना. हें पुराय प्रकरण फटींचें आसा. सध्या हें प्रकरण देवस्थान प्रशासका कडेन न्यायालयांत आशिल्ल्यान आपूण देवस्थान समितीचो अध्यक्ष ह्या नात्यान पत्रकार परिशदेंत उलोवपाक शकना. ताका लागून फोना वयल्यानूच प्रतिक्र्या दिता, अशें देवस्थान समितीचे अध्यक्ष राजेश धेंपे हांणी सांगलें.
दत्त मंदिरांत खंयचेच मुर्तीची चोरी जावंक ना. तीन मुर्त्यो नार्वे तिर्थार विसर्जीत केल्यात. प्रसादांत देवस्थानांत कांय दोश आशिल्ल्याचें सांगिल्लें. ते प्रमाण समितीचे वेंचणुके उपरांत आमी कामाक्षी देवी कडेन प्रसाद घेतलो. तेन्ना देवस्थानांत आशिल्ल्या तीन मुर्त्यां मदीं दोश आशिल्ल्याचें प्रसादांत म्हणिल्लें. त्यो तत्काळ विसर्जीत करच्यो, अशी सुचोवणी केल्ली. ते प्रमाण आमी दत्त मंदिरांत येवन दत्त महाराजांक सांगणें केलें आनी त्यो मुर्त्यो नार्वे तिर्थार विसर्जीत केल्यो, अशें समितीचे मुखत्यार श्याम बोडके हांणी सांगलें. शुक्रारा 27 जूनाक दिवचल मामलेदारान सकाळीं 11 वरांचेर नोटीस जारी करून सांजेच्या 4 वरांचेर हाजीर रावपाक सांगलें. आपणाक फावा नासलें हे खातीर भांडारी विठ्ठल सामंत हाजीर रावले. तेच रातीं दिवचल पुलीस स्टेशनार चार जाणांच्या नांवान कागाळ केली. शेनवारा 28 जूनाक सकाळीं आपूण कार्यालयांत आयलो, तेन्ना पुलिसांनी आपल्याक ताब्यांत घेतलो. ते उपरांत आपलो पूत अॅड. शर्मद बोडके आनी आमचे कायदेशीर सल्लागार अॅड. नेहाल कामत हांणी कायदेशीर तशेंच तंत्रीक बाजू सांबाळून आपल्याक आनी दिपेश कामत हांकां जामीन मेळोवन दिलो, अशेंय श्याम बोडके हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
