भांगरभूंय | प्रतिनिधी
दिवचल : एप्रीलांत आमठाणें धरणाचे मुख्य गेटींतल्या व्हॉल्वांत बिघाड जाल्लो. ताका लागून पुराय बार्देस म्हालाची उदका पुरवण 10 दीस खंडीत जाल्ली. ते उपरांत तात्पुरती दुरुस्ती करून उदका पुरवण सुरळीत केल्ली, मात हे गेटीचें दुरुस्तीकाम करप गरजेचें आशिल्लें. ते प्रमाण उदकास्रोत खात्या वतीन तें काम एके खाजगी कंपनीक दिल्लें. हें काम करपाचें आसल्यार धरण पुराय रितें करप गरजेचें आशिल्लें, ते प्रमाण धरणांतलें उदक आडयनासतना तें थेट अस्नोडें उदक शुद्धीकरण प्रकल्पाक सोडटात. ताका लागून सध्या धरण वाठारांतलें उदक सुकलां.
कंत्राटदाराक हें काम 30 दिसां भितर पुराय करपाची मुजत दिल्या, अशी म्हायती खात्याच्या अधिकाऱ्यांनी दिली. दुरुस्तीकाम सोंपले उपरांत रोखडीच गेट बंद करून धरणांत उदक सांठयतले. जर उण्या पावसाक लागून उदकाची पातळी उणी उरली जाल्यार साळांतल्यान पंपा वरवीं उदक ओडून पातळी नियंत्रणांत हाडटले. मार्चांत आमठाणे धरणाचे मुख्य गेटींतल्या व्हॉल्वांत बिघाड डाल्लो. त्या वेळार तात्पुरती दुरुस्ती केल्ली. मात आतां पुराय तरेन सगलें काम हातांत गेतलां. ताका लगून ह्या रस्त्या वयले येरादारीचेर लेगीत नियंत्रण दवरतले, अशीय म्हायती उदकास्रोत खात्या वतीन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
