भांगरभूंय | प्रतिनिधी
मडगांव : दोन तृतियांश जनतेन न्हयकारून लेगीत भाजप आयज सत्तेंत आसा. राष्ट्रीय मुद्यांचेर राष्ट्रीय फुडारी कशे वागतात, हो विशय वेगळो. गोंय आनी गोंयकारांचो विचार करुन निर्णय घेवन विरोधी पक्षांनी एक रावल्यार येवपी वेंचणुकेंत जैत शक्य आसा, अशें मत आपचे गोवा प्रदेशाध्यक्ष अमित पालेकार हांणी मांडलें.
मडगांवचे कार्यावळी वेळार प्रसारमाध्यमां कडेन चर्चा करतना श्री. पालेकार हांणी राज्यांत विरोधी पक्षांच्या युतीची गरज आशिल्ल्याचें परत सांगलें. मंत्री गोविंद गावडे हांणी आदिवासी समाजावेल्या अन्याया आड आवाज काडलो आनी हाका लागून तांकां मंत्रीपदा वेल्यान काडले. आदिवासी समाजाची उदरगत जायनाशिल्ल्याचें सांगून सरकारांत भ्रश्टाचार वाडटा अशें तांणी सांगलें. एसटी समाजान जांकां- जांकां फुडारी मानले तांची बरीच उदरगत जाली. मात भोवसंख्य समाज तसोच उरलो. आदिवासी समाजा खातीरचो निधी खर्च करिनात, हे पळोवनूच एसटी समाजांतली संघटना आप कडेन येता, अशें अमित पालेकार हांणी म्हणलें.
विरोधी पक्षांच्या एकजुटीक आपान केन्नाच ना म्हणूंक ना. लोकसभेच्या वेंचणुकां वेळार आपान इंडिया अलायन्सच्या बावट्या खाला काम करीत १५ हजारांच्या मतांनी खासदार विरियातो हांकां वेंचून हाडलें. आपान कामूच करूंक नासलें, जाल्यार ते जिखतले आसले काय, हें गोंयकारांक खबर आसा. जिखले उपरांत दोन- तीन म्हयन्यांनी काँग्रेसीन 2027 तल्या विधानसभा वेंचणुकेंत युती नाका अशें म्हणपाक सुरू केलां. काँग्रेसीचे राष्ट्रीय फुडारी येतात आनी युती नाका सांगतात, मात गोंयकारांक कितें जाय हें सगल्यांनी जाणून घेवपाची गरज आसा, अशें पालेकार हांणी सांगलें.
गोंय आनी गोंयकारांचो विचार करुन भाजपाक हारोवपाचें आसल्यार सगल्या विरोधी पक्षांनी एकठांय येवपाची गरज आसा. गोंयच्या फुडार्यांनी राष्ट्रीय फुडार्यांक गोंयांक कसली गरज आसा हें सांगपाची गरज आसा. तांकां हांगाची परिस्थिती कळना. आपच्या राष्ट्रीय फुडार्यांनी गोंयच्या निर्णयां खातीर सदांच स्वातंत्र्य दिलां, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
