भांगरभूंय | प्रतिनिधी
हालींच ‘गांव जाला जाणटो’ ह्या नाटकाच्या विक्रमी येसा उपरांत कला चेतना वळवय हो सांस्कृतीक पंगड नाटकाच्या मळार क्रांती घडोवन हाडटा. नाटक आनी तियात्र हांचो संगम करून गोंयच्या इतिहासांत नवो इतिहास घडयता. गोंयांत कोंकणी नाटकांक फामाद करपाक कला चेतनाचो म्हत्वाचो वांटो आसा. तातूंतच गोंयांत कोंकणी मळार तियात्रां खुबूच चलतात. मात, नाटक पळोवपी वर्ग वेगळो, तियात्र पळोवपी वेगळो, दोनूय घटकांक एकठांय हाडपाची, गोंयकारांक जोडपाची, एकठांय हाडपाची कामगिरी कला चेतना वळवयन केल्या. तियाटकाच्या रूपान तांणी केल्ली नवनिर्मिती आयज खुबूच फामाद जायत आसा. ह्या नव्या प्रवासाक गोंयकार उक्त्या मनान येवकार दितात.
‘काणी नव्या युगाची’ नांवाच्या ह्या निर्मितींत तियात्राच्या संगीत आनी विनोदी आंगांक नाटकाच्या भावनीक खोलायेकडेन जोडून तियाटकाची निर्मिती केल्या. जें एक वेगळेंच नाट्य स्वरूप म्हूण मुखार आयलां आनी ताका गोंयभर बरो प्रतिसाद मेळटा. कथानक नाटकाचेर आदारिल्लें आसलें तरी आमी कांय तातूंत तियात्र कलाकारांचो आस्पाव केला आनी तियात्रांतली कांतारांय घेतल्यात, अशें लेखिका आनी निर्माती सुचिता नार्वेकार हांणी सांगलें. ह्या नव्या स्वरुपाची संकल्पना सुमार दोन वर्सां सावन प्रक्रियेंत आशिल्ली, ती आतां सगल्यां सामकार आयल्या, अशेंय तिणें स्पश्ट केलें. “‘गांव जालां जाणटो’ खातीर तियात्र मोगी प्रेक्षकांचो सकारात्मक अभिप्राय मतींत घेवन आमी विचार केलो, ‘आमी फकत नाटक कित्याक करचें? तियात्र आनी नाटक ह्या दोनूय गजालींचो आस्पाव करपी उत्पादन कित्याक तयार करचें न्हय?'” ती सांगता.
नाटक आनी तियात्र ह्या दोनूय प्रकारांतल्या रसिकांक एकठांय हाडपाचें ध्येय आसा. ‘ह्या नाटकांत दरेकल्यान स्वताक पळोवपाक मेळपाक जाय. जांकां तियात्र आवडटा तांणी तो आपलो समजूंक जाय आनी जांकां नाटकाचो आस्वाद जाय तांकांय तशेंच दिसपाक जाय. अशे तरेन आमी सगळे एकठांय येवंक शकतात,’ नार्वेकार स्पश्ट करता.
जेन्ना आमी एकवटीत जातात तेन्ना आमचें बळगें वाडटा, देश फुडें वता अशें म्हजें मत आसा. ‘काणी नव्या युगाची’ हें कथानक मूळ न्हय. ह्या नाटकाचें नाट्य सादरीकरण दोन वर्सां पयलीं जाल्लें. हे नाटक शिक्षणा विशी, खास करून पालकांचे नदरेंतल्यान ताचो उगम जालो. “दोन वर्सां जालीं तरी कांयच बदलूंक ना,” तेन्ना तें नव्या रुपांत समेस्त गोंयकारां मेरेन पावता, अशेंय ती म्हणटा.
हें नाटक म्हणल्यार ससो आनी कांसव कथेचें आधुनीक पुनर्कथन. तातूंत तांच्या आवय-बापायन शिक्षणा खातीर दोन खूब वेगळे पद्दतीन उबारिल्ल्या जुंळ्यांचो एक जोडो आसा – आयच्या पालकत्वाचेर आनी शालेय शिक्षणाचेर प्रतिबिंब करपाक हे तियाटक प्रोत्साहन दिता. नाटकांत एका भुरग्याचो स्वभाव कांसवा सारको आनी दुसऱ्याचो सशा सारको आसता, अशें नार्वेकार सांगतात.
ह्या तियाटकांत 5 वर्सांचें भुमी राजदीप नायकूय आसा. राजदीप-सुचितान सुरू केल्ली नाट्य परंपरा फुडें व्हरपाचें काम भुमी करता. हें तियाटक सरकाराच्या घटकान खऱ्यांनीच पळोवपाची गरज आसा, अशेंय नार्वेकार हांणी म्हणलें. तियाटकाच्या रूपांत सुरू जाल्लो हो प्रवास येता त्या काळांत विक्रम रचतलो हातूंत मात्तूय दुबाव ना.
अमर पाटील
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
