भांगरभूंय | प्रतिनिधी
पणजी ः पर्ये- सत्तरीच्या ग्रीन व्हॅली रेस्टॉरंट लागसार शेनवारा, 5 जुलयाक सकाळीं 2.20 वरांचेर 27 वर्सां पिरायेच्या तरणाट्याचेर धारदार शस्त्रान गंभीर हल्लो केलो. हल्ल्यांत तरणाट्याच्या तकलेक गंभीर जखम जाल्या. पिडित अनिकेत सिंगबाळ (27, हावसिंग बोर्ड, साखळे) हाका रोखडोच उपचारा खातीर साखळे प्राथमीक भलायकी केंद्रांत व्हेलो.
हे घडणुकेची म्हायती मेळ्ळ्या उपरांत साखळे वाठारांत रातच्या वेळार गस्त घालपी दिवचल पुलीस तशेंच वाळपय पुलीस स्टेशनाचे निरिक्षक विजय राणे हांचे वांगडा पुलीस हवालदार निलेश फोगेरी, कॉन्स्टेबल दयेश खंडेपारकार आनी शैलेश धवने घडणूक सुवातेर पावले. फक्त 30 मिनटांनी पुलिसांनी आरोपीक ताब्यात घेतले. योगेश सुभाष राणे (27, देऊळवाडी, कारापूर, दिवचल) अशें आरोपीचे नांव आसा. ताका अटक केल्या.
रस्त्यार गाडी उबी करपाचें कारणावेल्यान दोगांय मदीं तोंडी वाद जालो. हाका लागून झगडीं जालीं आनी उपरांत हो हल्लो जालो अशें चवकशेंतल्यान स्पश्ट जालां. ह्या प्रकरणांत वाळपय पुलीस स्टेशनाचेर गुन्यांव नोंद केलां. ही पुराय कारवाय उत्तर गोंयचे पुलीस अधीक्षक राहुल गुप्ता आनी दिवचलचे पुलीस उपअधीक्षक विल्सन डिसोझा हांच्या मार्गदर्शना खाला आनी पुलीस निरिक्षक विजय राणे हांच्या फुडारपणा खाला जाली. पुलीस उपनिरिक्षक प्रथमेश गावस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
