भांगरभूंय | प्रतिनिधी
बायलां आनी बाल कल्याण खात्या वतीन ‘सखी’ हेल्पलायन
पणजी ः संकश्टांत आनी अडचणीत आशिल्ल्या 9 हजारां परस चड बायलांनी बायलां आनी बाल कल्याण खात्या कडेन संपर्क सादून आपल्यो समस्या सोडयल्यात. बायलांक मजत करपा खातीर राज्यांत बायलां आनी बाल कल्याण खात्याचें वन स्टॉप सेंटर ‘सखी’ आनी ‘बायल हेल्पलायन’ कार्यरत आसा.
बायलां आनी भुरगीं उदरगत खात्यान आतां मेरेन संकश्टांत आशिल्ल्या 9,318 बायलांक सोडयल्यात आनी तांकां फावो ती मजत दिल्या. ‘सखी’ ह्या वन स्टॉप सेंटरांत नोव्हेंबर 2015 ते मे 2025 मेरेन संकश्टांतल्या बायलांची 5,123 प्रकरणा नोंद जाल्यात. ह्या वन स्टॉप सेंटरांत तांकां पुलीस मजत, वैजकी मजत, कायदेशीर आनी मानसीक समुपदेशन, आलाशिरो आनी हेर गरजेच्यो वस्तू दितात.
‘सखी’ वन स्टॉप सेंटर ही केंद्राची येवजण, आनी हे येवजणे खातीर 100% निधी केंद्र सरकारा कडल्यान मेळटा. हिंसेचो बळी पडपी बायलांक सगळ्या तरांची सुविधा हांगा मेळटा. उत्तर आनी दक्षीण गोंयांत दरेकीं दोन ‘वन स्टॉप सेंटर’ आसात. उत्तर गोंयांत नोव्हेंबर 2015 सावन गोमेकोच्या फॉरेन्सिक विभागात ‘एनजीओ स्कॅन’ हे केंद्र चलयताले आनी दक्षीण गोंयांत मडगांवच्या पाजीफोंड हांगाच्या जुंता क्वार्टरांत ‘बायलांचो एकवोट’ नोव्हेंबर 2019 सावन हें केंद्र चलयताले. केंद्रीय बायलां आनी भुरगीं उदरगत मंत्रालयान जारी केल्ल्या मार्गदर्शक तत्वां प्रमाण खात्यान हीं दोनूय वन स्टॉप केंद्रां एनजीओ कडल्यान काडून घेतल्यांत आनी 1 नोव्हेंबर 2024 सावन खातें ती स्वता चलयता. सध्या उत्तर गोंय खातीर आशिल्लें वन स्टॉप सेंटर मेरशेच्या अपना घरांत स्थलांतरीत केलां.
बायलां हेल्पलायन ‘181’ वरवीं तात्काळ मजत
ह्या दोनूय वन स्टॉप सेंटरांचो आस्पाव बायलां हेल्पलायनींत केला. बायलां हेल्पलायन ‘181’ वरवीं हिंसाचाराक बळी पडपी बायलांक रोखडोच प्रतिसाद मेळटा आनी ही हेल्पलायन 24 वरां कार्यरत आसा. तशेंच ह्या हेल्पलायनी वरवीं बायलांक सरकारी येवजण्यां विशीं म्हायती मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
