भांगरभूंय | प्रतिनिधी
मुख्य वीज अभियंत्याची सुचोवणी
पणजी : जीं गिरायकां गरजेचे सुरक्षा उपाय करिनासतना जनरेटर वा वीजनिर्मितीची उपकरणां बसयतात तांचेर विजेची जोडणी तोडपा वांगडा हेर फौजदारी कारवाय जातली अशी शिटकावणी मुखेल वीज अभियंत्यान दिली. हे विशीं सुचवण्यो तशेंच नोटीस वीज खात्यान जारी केल्या.
जायतीं आस्थापनां आनी सामान्य गिरायक वीजपुरवणे खातीर जनरेटर वा इन्वर्टर हीं उपकरणां बसयतात. हीं उपकरणां बसयताना अर्थींग सयत हेर सुरक्षेचे उपाय करप गरजेचें आसता. जायते जाण सुरक्षा उपाययोजना करिनात. हाका लागून ट्रान्सफॉर्मर तशेंच हेर दुरूस्तीचीं कामां करपी लायनमनांक धोको आसता. सुरक्षा उपाय येवजण नाशिल्ल्यान लायनमनांक शॉक येवपाच्यो घडणुको घडल्यात. हे फाटभूंयेर वीज खात्यान शिटकावणी दिवपी नोटीस जारी केल्या. जनरेटर वा इन्वर्टर बसोवपा खातीर मान्यताय घेवचीच पडटा. तशेंच हेर सुरक्षेचे उपाय करप बंधनकारक आशिल्ल्याचें वीज खात्यान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
