भांगरभूंय | प्रतिनिधी
घडये आराखडो बदलून नव्यान नोंदणी करपाक केला अर्ज?
पणजीः रेईश मागूशचो वादांत सांपडिल्लो प्रस्तावीत मेगा प्रकल्प रद्द करपाचो निर्णय ’डीएलएफा’ न घेतला. मांडवी न्हंये देगेर दोंगुल्ल्यांचेर येवपी ‘द बे व्यू’ प्रकल्पाची नोंदणी रद्द करपा खातीर डीएलएफान गोंय रियल इस्टेट नियमन प्राधीकरणा कडेन (रेरा) अर्ज केला. प्रकल्पांच्या आराखड्यांत सुदारणा करून नव्यान प्रकल्पांची नोंदणी करपा खातीर आदली नोंदणी रद्द करपा खातीर अर्ज केला आसुंये, अशी म्हायती रेराच्या वरिश्ठ अधिकार्यान दिली.
रेईश मागूस तांवटे दोंगुल्लेचेर येवपी प्रकल्प फाटले काय म्हयने वादांत सांपडिल्लो. हो प्रकल्प सैमाचो नाश करून दोंगर बेकायदेशीर रितीन तासून येता म्हण ह्या प्रकल्पाआड भरपूर आंदोलनां जाल्लीं. ह्या आंदोलना उपरांत शार नियोजन मंत्री विश्वजीत राणे हांणी ह्या प्रकल्पांक दिल्ल्या मान्यतायांचो नव्यान नियाळ घेवपाचें जाहीर केल्लें. फाटल्या स म्हयन्यांत दोंगर कातरपा खातीर कसलीच मान्यताय दिवंक ना आनी त्या पयलीं दिल्ले मान्यतायेच्या आदाराचेर हें काम चल्लां. ह्या प्रकल्पाचेर कारवाय करचे पयलीं परवानगेची पडताळणी करप गरेजेचें आसा, अशें मंत्र्यान सांगिल्लें.
मात, शुक्रारा गोंय रेरान एक परिपत्रक उजवाडाक हाडून मेसर्स डीएलएफ एक्सक्लुसिव्ह फ्लोर्स प्रा. ली. आनी भामिनी रियल इस्टेट डॅव्हलपर्स लिमिटेड हांणी आपलो द बे व्यू प्रकल्प फाटीं घेवपा खातीर वा तांची नोंदणी रद्द करपा खातीर अर्ज सादर केला. हो रिअल इस्टेट प्रकल्प फाटीं घेवपाक वा तांची नोंदणी रद्द करपाक खंयचेंच वैयक्तीक वा कायदेशीर संस्थेक आक्षेप आसल्यार तांणी १५ दिसा भितर आपले आक्षेप सादर करचे, अशी सुचोवणी रेरान दिल्या.
हे विशीं उलयतना रेराच्या वरीश्ठ अधिकार्यान सांगलें, नियोजन आनी उदरगत प्राधिकरणात (पीडीए) वा शार नियोजन खात्यांत (टीसीपी) तांणी प्रकल्पांच्या आराखड्यांत बदल करपाचें थारयला आसत. देखून तांणी पयलींची नोंदणी रद्द करपाक अर्ज केला आसूं ये.
ह्या आराखड्यांत बदल केले उपरांत ते सुधारीत आराखडो रेरा कडेन सादर करून परत ह्या प्रकल्पांची नव्यान नोंदणी करपाक शकतात आनी तांकां तशी मुभा आसा, अशी म्हायती अधिकार्यान दिली.
‘भांगरभूंय’चे प्रतिनिधीन हे विशीं डिएलएफचे प्रवर्तकांक संपर्क केलो पुण तांचेनी हे विशीं उलोवपाक न्हयकार दिलो.
रेईश मागूस गावाच्या तांवटे वाठारांत सर्वे क्रं. 87/1-A-1 आनी 87/1-A-2 सुवातेंत डिएलएफच्या प्रकल्पांक रेरान वर्स २०२२सात मान्यता दिल्ली. हो प्रकल्प २०२७ पुराय जावपाचो आसलो. मात वाडट्या विरोधाक लागून हे प्रकल्पाचे सुवातेर फक्त प्लॉटींग करून दवरिल्लें. २८,४७४ चौ. मी. सुवातेत सुमार ४४३ कोटी रुपया खर्च करून ८४ व्हिला ह्या प्रकल्पांत येवपाच्यो आसल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
