भांगरभूंय | प्रतिनिधी
वॉशिंग्टन, खबरां संस्था: कर आनी खर्च उणो करपाक अमेरिकेचे राष्ट्राध्यक्ष डोनाल्ड ट्रम्प हांणी हाडिल्लें ‘बिग ब्युटीफुल’ विधेयक बिरेस्तारा अमेरिकन संसदेच्या कनिश्ठ सभाघरांत (प्रतिनिधी सभाघर) मंजूर जालें. ह्या विधेयकाचे वटेन 218 खासदारांनी मतदान केलें, जाल्यार 214 जाणांनी विरोधांत मतदान केलें.
ट्रम्प हांच्याच पक्षांतले दोन खासदार थॉमस मॅसी आनी ब्रायन फिट्झपॅट्रिक हांणी ह्या विधेयका आड मतदान केलें. ट्रम्प आनी एलन मस्क हांणी ह्या विधेयका विशीं एकमेकां आड खर विधानां केल्लीं.
व्हाइट हाऊसच्या प्रेस सेक्रेटरी कॅरोलिन लेविट हांणी सांगलें, ट्रम्प शुक्रारा सांजेवेळार 5 वरांचेर अमेरिकेच्या स्वातंत्र्य दिसा (4 जुलय) एका व्हड आनी भव्य समारंभात ह्या विधेयकाचेर सय करतले. हें विधेयक अमेरिकन संसदेच्या वरिश्ठ सभागृहांत, सिनेटांत फकत दोन दिसां आदीं 50- 51 च्या कांय फरकान मंजूर जाल्लें. उपराष्ट्राध्यक्ष जेडी व्हान्स हांणी ह्या विधेयकाचेर निर्णायक मतदान केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
