भांगरभूंय | प्रतिनिधी
हल्ल्या खातीर वापरिल्लें अॅसीड कंपनींतल्यान चोरिल्लें
म्हापशें: धारगळे चल्याचेर अॅसीड हल्लो करपा खातीर करासवाडो, थिवी उद्देगीक वसणुकेंतल्या जीकेबी कंपनींतलें 20 लिटर सल्फरीक अॅसीड चोरलें. ह्या प्रकरणांत दुबावीत आरोपी निलेश गजानन देसाय (रा. दाबीवाडी, कळणें दोडामार्ग) हाचे आड म्हापशें पुलिसांनी गुन्यांव नोंद केला.
ह्या प्रकरणांत जीकेबी ऑथाल्मीक लिमिटेड कंपनीचे वरिश्ठ वेवस्थापक सेड्रीक लोबो हांणी पुलिशेंत कागाळ नोंद केल्या. ते प्रमाण पुलिसांनी भा.न्या.सं.च्या 281, 125 आनी 125(ब) कलमा खाला गुन्यांव नोंद करून फुडलो तपास म्हापशें पुलीस करतात.
हो सल्फरीक अॅसीड चोरयेचो प्रकार 28 ते 30 जून मजगतीं घडिल्लो.
दुबावीत आरोपी निलेश देसाय हो हे कंपनींन हावसकिपींग विभागांत नोकरी करतालो. हाचो फायदो घेवन दुबावितान कंपनीच्या प्राकारांत सांठोवन दवरिल्ल्या सल्फरीक अॅसिडाच्या कॅनांतलें एक 20 लिटराचें कॅन ताणें चोरून व्हेलें.
उपरांत ह्या अॅसिडाचो वापर दुबावितान धारगळे बशीची वाट पळयत उबो आशिल्ल्या 17 वर्सां पिरायेच्या चल्याचेर हल्लो करपा खातीर केलो. ह्या अॅसीड हल्ल्यांत तो चलो गंभीर जखमी जालो आनी ताचेर गोमॅकाँत उपचार सुरू आसात. ही घडणूक 30 जून दिसा सकाळीं 7.45 वरांच्या सुमाराक घडिल्ली.
पेडणें पुलिसांनी ह्या हल्ल्या संबंदी केल्ले चवकशेंत दुबावितान हें अॅसीड वयले कंपनींतल्यान हाडिल्ल्याचें दिसून आयिल्लें. ते प्रमाण पुलिसांनी कंपनीच्या वेवस्थापनाक हाची म्हायती दिली. तशेंच दुबाविताक ह्याच कंपनींतल्यान अटक केल्ली. दुबावीत आरोपी हो घडणुकेचे आठ दीस पयलींच जीकेबी कंपनींत कामाक लागिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
