भांगरभूंय | प्रतिनिधी
मडगांव: राय सावन बायलेची भांगराची सरपळी चोरिल्ली. ह्या प्रकरणांत मायणा कुडटरी पुलिसांनी पुण्यां सावन दुबावीत रहीम मिर्झा हाका ताब्यांत घेवन अटक केली. ताका पांच दिसांची पुलीस कोठी दिल्या.
दक्षीण गोंय जिल्हो पुलिसांची गस्त आसतनाय गळ्यांतली भांगराची सरपळी चोरपाच्यो घडणुको घडत आसतात. 2023 वर्सा भांगराचे सरपळेची चोरी 10 जाल्यार पारूं वर्सा आठ प्रकरणां विवीध पुलीस स्टेशनांनी नोंद जाल्यात.
ह्या चोरी प्रकरणांक लागून परतून एकदां इराणी टोळी सक्रीय जाल्ल्याची चर्चा आशिल्ली. राय बस स्टॉपार बशीची वाट पळयत आशिल्ल्या सुषमा शिरोडकार हांच्या गळ्यांतली भांगराची सरपळी झोमून दुचाकी वेल्यान आयिल्ल्या दोगां दुबावितांनी पळ काडिल्लो.
ही चोरयेची पद्दत इराणी गँगा कडेन संबंदीत दिसून आयिल्ली. ते प्रमाणा मायणा कुडटरी पुलिसांनी तपासाक सुरवात केल्ली. तपासा उपरांत मायणा कुडटरी पुलिसांनी पुण्यां एक पंगड धाडून दुबावीत रहीम मिर्झा हाका अटक केली. हे अटकेक लागून गोंयांतल्यो भांगराची सरपळी चोरी प्रकरणांत इराणी गँगांतल्या आनीक कांय जाणांक अटक जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
