भांगरभूंय | प्रतिनिधी
यूजीपी सयत 4 पक्षांक कारणां दाखय नोटीस
भांगरभूंय । प्रतिनिधी
पणजी : येणावळ खात्याचे मंत्री बाबूश मोन्सेरात हांणी 2017 चे विधानसभा वेंचणुके पयली स्थापन केल्ले युनायटेड गोवन्स पार्टीची नोंदणी आतां रद्द जावपाची आसा. केंद्रीय वेंचणूक आयोगाच्या आदेशा उपरांत गोंयच्या मुखेल वेंचणूक अधिकाऱ्यांनी कारणां दाखय नोटीस जारी केल्या. युनायटेड गोवन्स पार्टी सयत गोवा नॅशलिस्ट पार्टी, गोवा प्रजा पार्टी आनी गोंयकारांचो ओत्री आसरो या पक्षांक लेगीत नोटिसो जारी जाल्यात.
बाबूश मोन्सेरात हांणी पणजी मतदारसंघांत 2017 ची विधानसभा वेंचणूक युनायटेड गोवन्स पार्टीचे उमेदवारीचेर लडयल्ली. भाजपाच्या सिद्धार्थ कुंकळ्येकार हांचे कडल्यान ते हारिल्ले. तशेंच कुठ्ठाळी मतदारसंघांतल्यान रमाकांत बोरकार हांणी युनायटेड गोवन्स पक्षाचे उमेदवारीचेर वेंचणूक लडयल्ली. ते लेगीत हारिल्ले. पक्ष स्थापन जालो तेन्ना आदले आमदार टोनी फर्नांडीस अध्यक्ष आशिल्ले. 2017 चे वेंचणुके पयलीं तांणी पक्षाचो राजिनामो दिवन काँग्रेसींत प्रवेश केलो. टोनी फर्नांडीस हाचे उपरांत उदय मडकयकार अध्यक्ष जालो. टोनी फर्नांडीस हांचे उपरांत कांय काळ आपूण अध्यक्ष आशिल्लो, अशी म्हायती उदय मडकयकार हांणी दिली.
सध्या भाजप सरकारांत मंत्री आशिल्ले बाबूश मोन्सेरात हे खूबश्या पक्षांत आशिल्ले. युनायटेड गोवन्स पार्टीची स्थापना तांणी केल्ली. युनायटेड गोवन्स पार्टी, गोवा नॅशलिस्ट पार्टी, गोवा प्रजा पार्टी आनी गोंयकारांचो ओत्री आसरो ह्या पक्षांनी फाटल्या 6 वर्सांत विधानसभा वा लोकसभा वेंचणुकेंत उमेदवार दवरूंक नात. हाका लागून घटनेचे 324 कलम आनी लोकप्रतिनिधी कायदो 1951 च्या कलम 29 ए खाला वेंचणूक आयोगान ह्या चार पक्षांची नोंदणी रद्द करपाची प्रक्रिया सुरू केल्या. ह्या चारूय पक्षांच्या नोंदणीकृत कार्यालयांच्या नाम्याचेर राज्य वेंचणूक अधिकाऱ्यांनी कारणां दाखय नोटीस धाडल्या. नोंदणी कित्याक रद्द करची न्हय हाचेर अध्यक्ष वा सरचिटणीसांक 15 जुलय 2025 मेरेन कागदपत्रां सयत प्रतिज्ञापत्रा सयत जाप दिवची पडटली. हाचे उपरांत 16 जुलय 2025 दिसा दनपारां 3 वरांचेर सुनावणी जातली. सुनावणी उपरांत राज्य वेंचणूक अधिकारी वेंचणूक आयोगाक अहवाल सादर करतले. पक्षांच्या प्रतिनिधींनी नोटिशेक जाप दिली ना वा सुनावणेक हाजेरी लायली ना जाल्यार तसो अहवाल वेंचणूक अधिकारी सादर करतले. युनायटेड गोवन्स पार्टीचे नोंदणीकृत नामो ग्रामीलो अपार्टमेंट, दोंदरे, ताळगांव असो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
