भाजपाचो खरो ‘डीएनए’ आदिवासी समाजाचोच

भांगरभूंय | प्रतिनिधी

मुख्यमंत्री : नांव घेनासतना गोविंद गावडे हांचेर बाण

भांगरभूंय । प्रतिनिधी

पणजी : भाजपाचो खरो डीएनए हो आदिवासी समाजाचोच आसा. आदिवासी समाजा कडेन आपलें रगताचें नातें नासलें तरीय समाजीक आनी भावनीक नातें आसा. रगताचें नातें आशिल्ले कितले तरी आयले आनी गेले, अश्यां उतरांनी मुख्यमंत्री डॉ. प्रमोद सावंत हांणी गोविंद गावडे हांकां परती जाप दिल्या. गोविंद गावडे हांचें नांव मात तांणी घेवंक ना.

मुख्यमंत्र्यां सयत सभापती रमेश तवडकार हांणी लेगीत गोविंद गावडे हांचें नांव घेनासतना बाण मारलो. आदिवासींच्या कल्याणा खातीर स्वतंत्र खातें तयार करून येवजण्यो मार्गाक लावपाचें काम भाजपानूच केलें. भाजपान तयार केल्ले पिचीचेर भाजपाच्याच कार्यकर्त्यांनी बॅटींग करपाक जाय आशिल्ली, पूण भाजपा कडेन कसलोच संबंद नाशिल्लो कोण तरी येता आनी बॅटींग करून वता. अश्या लोकांचें चुरचुरें दिसता, असो थोमणो सभापती रमेश तवडकार हांणी उलोवपांत मारलो.

सांग्यार बिरेस्तारा ‘धरती आभा जनभागिदारी’ मोहिमेची कार्यावळ जाली. हे कार्यावळींत मुखेल सोयरे म्हूण मुख्यमंत्री उलयताले. केंद्रीय आदिवासी खात्याचे मंत्री ज्युएल ओरॅम, सभापती रमेश तवडकार, समाज कल्याण मंत्री सुभाष फळदेसाय, खासदार सदानंद शेट तानावडे, आमदार गणेश गांवकार आनी हेर मानेस्त ह्या वेळार हाजीर आशिल्ले.

आदिवासी लोकांक पक्कीं घरां नात. हक्क नाशिल्ल्यान कांय जाण शौचालय बांदपाक शकनात, हाचें आपल्याक दुख्ख दिसता. भारतीय जनता पक्षाच्या सरकारानूच आदिवासींच्या उदरगती खातीर काम केलां. आपल्या सरकाराच्या काळांत आदिवासी आयोग स्थापन जालो. रमेश तवडकार हे त्या आयोगाचे आयुक्त आशिल्ले. आदिवासी म्हामंडळ स्थापन जालें. आदिवासींच्यो समस्या आनी संस्कृती समजून घेवपा खातीर आदिवासी संशोधन केंद्र स्थापन जालें. फर्मागुडी आदिवासी म्युझियनाचें काम सुरू आसा. काजूकट्टा वाठारांत वचपा खातीर रस्तो नाशिल्लो. 7 कोटी रुपया खर्च करून आपल्याच सरकारान रस्तो बांदलो. आदिवासी समाज भावांच्या सक्षमी करणा खातीर खूबश्यो येवजण्यो आसात. ह्या येवजण्यांची 100 टक्के कार्यवाही करतले. 10 हजार रान हक्क दाव्यांतले 3500 दावे निकालात काडल्यात. 19 डिरेंबर मेरेन सगळे दावे निकालात काडटले, अशें आस्वासन मुख्यमंत्र्यान दिलें.

केंद्रीय मंत्री ज्युएल ओरॅम हांचें ह्या वेळार उलोवप जालें. आदिवासींच्या कल्याणा खातीर केंद्रान 79 हजार कोटींची तजवीज केल्या. सगळ्या येवजण्यांची कार्यवाही करून आदिवासींची उदरगत करपाचें आस्वासन तांणी दिलें.

समाज कल्याण मंत्री सुभाष फळदेसाय हांणी येवकार दिलो. सभापती तवडकार आनी खासदार तानावडे हांचीय ह्या वेळार उलोवपां जालीं. मंत्रीपद गेले उपरांत गोविंद गावडे हांणी सभा घेवन प्रदेश अध्यक्ष दामू नायक हांचे सयत भाजप फुडाऱ्यांचेर टिका केल्ली. ते उपरांत आदिवासींचे जाहीर कार्यावळींत मुख्यमंत्री डॉ. प्रमोद सावंत आनी सभापती तवडकार हांणी आदिवासी समाज भावां मुखार गोविंद गावडे हांकां लक्ष्य केले.