भांगरभूंय | प्रतिनिधी
भांगरभूंय । प्रतिनिधी
पणजी : बुधवारा रातीं आनी बिरेस्तारा दीसभर गोंयाक पावसान झोड दिलो. पावसाक लागून पडझड जावन लुकसाणीच्या घडणुकांची नोंद जाली. पावसाचो नेट लक्षांत घेवन शिक्षण खात्यान आयज शुक्रारा 4 जुलयाक शाळांक सुटी दिवपाचो निर्णय घेतला. जाल्यार बालवाडयो आनी आंगणवाडयो लेगीत बंद आसतल्यो. मात म्हाविद्यालयां मात सुरू आसतलीं. दीसभरांत गोंयांत वेगवेगळ्या सुवातांचेर रस्त्याचेर उदक सांचपाच्यो घडणुको घडल्यो. पाड्ड्या कुशावती न्हंयेक हुंवार आयिल्ल्यान केपें – मडगांव रस्तो उदका पोंदां गेलो. पावसाक लागून चिंबला एका घराची वणत कोसळून पडली. हवामान खात्यान शुक्रारा उटंगाराच्या पावसाची शक्यताय उक्तावन पावसाचो ऑरेंज अलर्ट जारी केला.
गोंयांत बुधवारा सकाळीं 8.30 वरां मेरेन 6.34 इंच पावसाची नोंद जाली. 24 वरांत धारबांदोड्यां 9.03 इंच पावस पडलो. गोंयांतल्या 14 मदल्या 11 केंद्रांनी 6 इंचां परस अदीक पावसाची नोंद जाली. पोरणें गोंया 7.37 इंच, मडगांवां 7.32 इंच, म्हापश्यां 6.93 इंच, सांग्यार 6.84 इंच, फोंड्यां 6.65 इंच जाल्यार पणजे 6.08 इंच पावसाची नोंद जाली. गोंयांत 1 जून ते 3 जुलय मेरेन सरासरी 40 इंच पावसाची नोंद जाल्या. फाटल्या 24 वरांत 1 जूना सावनच्या सगल्यांत चड पावसाची नोंद (161 मिमि) जाल्या. बिरेस्तारा सकाळीं 8.30 ते सांजेच्या 5.30 वरां मेरेन पणजे 2,12 इंच जाल्यार मोपा 1.81 इंच पावसाची नोंद जाली.
गोंयांत बिरेस्तारा फांतोडे सावनूच उटंगाराच्या पावसाक सुरवात जाली. दीसभर पावसाचो नेट कायम आशिल्लो. सांजे उपरांत घोग्यांनी पावस चालूच आशिल्लो. पावसान तिसवाडी, बार्देस, पेडणें, दिवचल, सत्तरी, सांगें, साश्टी, फोंड्यां, धारबांदोड्या पडझडीच्यो घडणुको घडल्यात. पावसान गोंयांतल्या सगल्याच न्हंयांच्या उदकाची पातळी वाडल्या. हरमला भटवाडी वाठारांत रस्त्याचेर उदक सांचून उरलें. नेत्रावळी वाठारांत पालसण कोसळपाची घडणूक घडली. म्हाड्डोळा झाड पडून घर तशेंच गाडयांचें लुकसाण जालें. राजधानी पणजे दयानंद बांदोडकार रस्तो, मळा, कदंब बसस्टॅण्ड वाठार, भाटलें, पाटो वाठारांतल्या कांय रस्त्यांचेर उदक सांचिल्लें.
पावसाक लागून गोंयांत चडांत चड तापमान खूब देंवलां. बिरेस्तारा पणजे चडांत चड 27 अंश जाल्यार उण्यांत उणें 22.8 अंश सेल्सियस तापमानाची नोंद जाली. मुरगांवां चडांत चड तापमान 28.5 अंश जाल्यार उण्यांत उणें 23.6 अंश सेल्सियस आशिल्लें. फुडले स दीस गोंयांतलें चडांत चड 26 ते 27 जाल्यार उण्यांत उणें तापमान 24 अंश सेल्सियस आसपाची शक्यताय आसा. गोंयांत 5 ते 9 जुलय मेरेन मध्यम स्वरुपाच्या पावसाची शक्यताय आसा. हे खातीर खात्यान ह्या पांच दिसां खातीर पावसाचो यलो अलर्ट जारी केला. मजगतीं, शिक्षण संचालकान जारी केल्ल्या परिपत्रकांत म्हणलां, ल्हान भुरग्यांचे सुरक्षेचे नदरेन हो निर्णय घेतला. विद्यार्थ्यां वांगडा सिक्षकां कातीर लेगीत ही सुटी लागू आसा. मात प्रशिक्षणा खातीर नेमिल्ल्या शिक्षकांनी हाजीर रावप गरजेचें आसा. शाळांनी वचपी विद्यार्थ्यांनी घरांतूच रावचें आनी हुंवाराचें उदक भरिल्ले रस्ते, न्हंयांदेगांचेर तशेंच हेर घातक सुवातांचेर वचप टाळचें, असोय उलो शिक्षण खात्यान मारला.
अंजुणेंचो उदका सांठो 7 टक्क्यांनी वाडलो
उटंगाराच्या पावसाक लागून गोंयांतल्या धरणांतल्या उदका सांठ्यांत गतीन वाड जाल्या. बुधवारा अंजुणें धरणांतलो उदका सांठो 34 टक्के आशिल्लो. बिरेस्तारा तातूंत 7 टक्क्यांनी वाड जावन तो 41 टक्के जालो. 3 जुलय मेरेन साळावली 120 टक्के, चापोली 78 टक्के, पंचवाडी 103 टक्के जाल्यार गवाणे धरणांत 100 टक्के उदकाचो सांठो बाकी आशिल्लो.
पावसान हुपलो 65 इंचांचो हुमरो
गोंयांत 1 मे ते 3 जुलय ह्या काळांत सरासरी 66.41 इंच पावसाची नोंद जाल्या. 1 ते 31 मे ह्या काळांत 25.98 इंच जाल्यार 1 जून ते 3 जुलय मेरेन 40.43 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
