भांगरभूंय | प्रतिनिधी
– सांत इस्तेंवांतल्या एका हायस्कुलाच्या शिक्षका आड गुन्यांव नोंद
– 4 भुरग्यांक तपासणे खातीर व्हेले जीएमसींत
– पालकां कडल्यान पोरणें गोंय पुलीस स्टेशनांत कागाळ
– शिक्षकाक निलंबीत करपाचे मागणेक नेट
भांगरभूंय | प्रतिनिधी
पणजी : सांत इस्तेंवांतल्या एका हायस्कुलाच्या शिक्षकान यत्ता णववेच्या 11 विद्यार्थ्यांक बडोवपाचो प्रकार सध्या गाजता. तातूंतल्या 4 विद्यार्थ्यांक गंभीर दुखापत जाल्ल्यान तांकां जीएमसींत व्हरचे पडले. ह्या विद्यार्थ्यांच्या कपळाक, खांदाक आनी पांयाक खुबूच मार लागला. ह्या 4 विद्यार्थ्यांच्या पालकांनी पोरणें गोंय पुलीस स्टेशनांत त्या शिक्षका आड कागाळ केल्या. मजगतीं, त्या शिक्षकाक निलंबीत करात, त्या शिक्षकान भुरग्यांची, पालकांची माफी मागची म्हूण पालकांनी नेट धरला.
ह्या शिक्षकान भुरग्यांक मेळत तसो बडोवपाक सुरवात केल्ली, एका शिक्षकान ताका आडयलो, तेन्ना तो रावलो, अशें एका विद्यार्थ्यान सांगलें. आनीक 2 भुरग्यांकूय तो बडोवपाचो, मात ते दोगूय ताचे तावडेंतल्यान सुटले, अशेंय ताणें सांगलें.
हीं भुरगीं वर्गांत क्रिकेट खेळटाली, बोवाळ जाता म्हूण तो शिक्षक थंय आयलो आनी सगल्यांक सभाघरांत घेवन गेलो, थंय एकल्यान विरोध केलो, तेन्ना ताणें ताका बडोवपाक सुरवात केली, अशें दुसऱ्या विद्यार्थ्यान सांगलें.
यत्ता णववेंत शिकपी आपल्या चल्याक बडयेन मारलां म्हूण एका पालकान म्हायती दितना सांगलें. घडणुकेची म्हायती मेळटाच आपणें धांव मारली. भुरग्यांक खुबूच मार लागिल्लो म्हूण पुलिशेंत कागाळ केली, अशेंय ताणें सांगलें.
स्कुलाच्या वेवस्थापनान कागाळ फाटीं घेवची म्हूण यत्न केल्ले. त्या शिक्षकाक मेमो काडटा अशेंय सांगलें, मात आमी आमच्या निर्णयाचेर ठाम रावले, अशेंय ताणें सांगलें.
दुसऱ्या एका पालकानूय अशीच म्हायती दिली. ती जेन्ना हायस्कुलान पावली तेन्ना कितें जालां तें कोणूच सारकें सांगिनाशिल्ले. तिच्या 15 वर्सांच्या पुताक खुबूच मार लागिल्लो, पांय, खांदो सुजिल्लो, अशें तिणें सांगलें. शिक्षकान दांड्यान बडयलां म्हूण तिच्या पुतान तिका सांगलें. शिक्षकान अशें करप योग्य न्हय, अशेंय तिणें म्हणलें. सगल्या जखमी विद्यार्थ्यांक खोर्ले (तिसवाडी) एका खाजगी हॉस्पिटलांत व्हेल्ले. मजगतीं, कागाळ आयल्या म्हूण पोरणें गोंयचे पुलिसूय थंय पावले. तांणी दुबावीत शिक्षकाक पुलीस स्टेशनांत आपोवन ताचे कडल्यान म्हायती जाणून घेतली. ताचे कडल्यान जाप मागली. गोंय बाल हक्क कायदो 2003 खाला कलम 118(1), 352 भा.न्या. सं. आनी कलम 8(2) प्रमाण त्या शिक्षका आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
