भांगरभूंय | प्रतिनिधी
म्हापशें ः कळंगूटेचो गोल्ड टच धी लझरी स्पा हो स्पा पार्लर शॉर्ट सर्कीटाक लागून लागिल्ल्या उज्यांत लासून गोबोर जालो. हे घडणुकेंत सुमार १० लाखांचें लुकसाण जालें.
ह्या स्पा पार्लराक बिरेस्तारा सकाळीं सुमार ८ वरांचेर उजो लागलो आनी कांय मिटांनीच हो उजो बगबगपाक लागलो. सकाळच्या ८.१५ वरांचेर पिळर्ण उजो पालोवपी दळाक हे विशीं म्हायती मेळटांच दळाचे जवान पंदरा मिनटांनीच घडणुके सुवातेर पावले. दळाच्या जवानांनी रोखडेंच उजो नियंत्रणांत हाडपाचें काम हातांत घेतलें. तो मेरेन पुराय स्पाक उजो पातळल्लो. आठ कुडींच्या ह्या स्पांत गादयो, टॉवेल, एसी आनी हेर सामान आशिल्लें. ते सगलें लासून गोबोर जालां.
ह्या स्पाचो धनी राकेश कोराडे इमारतीचे पयले माळयेर आशिल्लो. स्पाच्या सकयल रेस्टोरंट आसा. तें उजो पालोवपी जवानांनी वाटयलें.
पिळर्ण उजो पालोवपी दळाचे अधिकारी दामोदर पेडणेंकार हांच्या मार्गदर्शनाखाला उपअधिकारी सनी फायदे, दिनेश गावडे, प्रितेश मालदार, श्रीकांत सावंत, प्रल्हाद कोटकर, राजकिरण पेडणेंकार हांचे सयत म्हापशें दळाचे उपअधिकारी ज्ञानेश्वर सावंत आनी वांगड्यांनी हो उजो पालयलो. घडणुकेचो पंचनामो कळंगुटे पुलीसांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
