भांगरभूंय | प्रतिनिधी
आरजीपी अध्यक्ष मनोज परब हांचो आरोप
पणजी : पिर्ण गांवचो रस्तो रुंद करपाचो आशिल्ल्यान हांगचे लोक हुस्को करपाक लागल्यात. हांगच्या सुमार ७० टक्के लोकांचीं घरां, दुकानां, शेतां, देवळां ह्या रस्त्या कुशीकूच आसा. आतां रुंदीकरणा खातीर नोटीस आयिल्ल्यान थळावे भियेल्यात. मात, थिवेचे आमदार आनी मंत्री नीळकंठ हळर्णकार, सरपंच संदीप तानावडे हे विशीं गंभीर नात. तांकां लोकांच्या समस्यांचें कांयच पडून गेल्लें ना. हाका लागूनच ते थळाव्यांक तोंड दाखयनात, असो आरोप आरजीपी अध्यक्ष मनोज परब हांणी केला.
बुधवारा पणजे जाल्ले पत्रकार परिशदेंत परब हांणी, प्रस्तावीत रस्तो रुंदीकरणाक थळाव्यांचो खर विरोध आसा. हाका लागून लोकांचीं घरां, शेतां, दुकानां वतलीं. ह्यान पयलीं ग्रामसभेंत मंत्री नीळकंठ हळर्णकार हांणी हजर रावन लोकांक स्पश्टीकरण दिवपा विशीं थाराव घेतिल्लो. मात हळर्णकार हांणी हाचे कडेन आडनदर केली. तांणी एके वटेन लोकांचो अपमान केलो. सरपंच संदीप तानावडे हे आदीं लोकां वांगडा आशिल्ल्याचें नाटक करताले. मात आतां तें उक्तें जालां. कांय दिसां आदीं हळर्णकार लिपून गांवांत आयले आनी रोंपे वाटून थंयच्यान पळून गेले. तांकां लोकांक तोड दाखोवपाची हिंमत नासुये.
सध्या आमदार विजय सरदेसाय आनी खासदार विरीयातो फर्नांडीस हे पिर्ण गांवांत येवन राजकारण करतात. तांणी आदीं आपल्या मतदासंघांतले प्रस्न सोडोवचे. मुळांत १०,१५ आनी २५ मीटर लांबायेचे रस्ते हे प्रादेशीक आराखडो २०२१ तल्यान आसात. तेन्नाच्या कॉंग्रेस सरकारान गोंयच्यो जमनी दिल्लीकरांक खपोवचे खातीर हो आराखडो हाडिल्लो. पर्रीकरांचें सरकार आयले उपरांत ताचेर बंदी आयली. विजय सरदेसाय नगर नियोजन मंत्री जाले काय ते परत उक्तो करतलो. सध्याची भाजप सरकार तोच फुडें व्हरता अशें परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
