भांगरभूंय | प्रतिनिधी
मडगांव : नेसाय फेज-दोन वाठारांत बेकायदेशीरपणान हाडिल्ले एके गाये सयत दोन वासरांची बजरंग दळाच्या गोंय विभागांतल्या गोरक्षकांनी मायना-कुडतरे पुलिसांचे मजतीन सुटका केली. सध्या ह्या सगल्या जनावरांक जांबावलेच्या ध्यान फावंडेशनाचे गोशाळेंत व्हेल्यांत.
मंगळारा सांजेवेळार उसरां थळाव्यां कडल्यान मेळिल्ले म्हायती उपरांत गोरक्षकांनी नेसाय फेज दोन हांगा एका घरा लागसारचे मेकळे सुवातेंत गाय आनी दोन वासरांक बांदून दवरिल्लें पळयलें. गोरक्षक घडणुके सुवातेर पावतांच, त्याच वाठारांतल्या एका मनशान हीं गोरवां आपल्या घरांत व्हरून दवरलीं. कायदो आनी सुव्यवस्थेचो प्रस्न निर्माण जावचो न्हय म्हणून गोरक्षकांनी मायणा-कुडतरच्या पुलिसांक आपयले.
पुलिसांनी संबंदीत मनशा कडेन चवकशी केली तेन्ना, तांणी तीं गोरवां पेडणेंच्यान विकत घेतिल्ल्याचें सांगलें. मात, त्या वेव्हारा संबंदी कसलींच कागदपत्रां सादर करूंक ना. परिणाम, पुलिसांच्या हाजेरींत गाय आनी वासरांची सुटका केली. ह्यान पयलींय खारेबांधार मारपा खातीर हाडिल्ल्या गोरवांक बजरंग दळाच्या गोरक्षकांनी वाटायल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
