भांगरभूंय | प्रतिनिधी
पणजी: गोंयांतल्या बँकांनी महिला आपमजत गट, उद्देजक, स्टार्टअप हांकां मजत करूंक जाय. गोंयांत बायलांच्या फुडारपणा खाला विकास करपाचो आसत जाल्यार बँकांची भुमिका म्हत्वाची थारतली अशें मुख्यमंत्री डॉ. प्रमोद सावंत हांणी सांगलें.
मंगळारा पणजे जिल्हो ग्रामीण विकास यंत्रणे वतीन बँकां खातीर आयोजीत केल्ल्या दोन दिसांचे कार्यशाळेच्या उक्तावणा वेळार ते उलयताले. ह्या वेळार डीआरडीएचे प्रेमराज शिरोडकार, दीपाली नायक, एसएलबीसीचे कार्लोस रोड्रिग्ज, तिलक दास बी मानेस्त हाजीर आशिल्ले.
मुख्यमंत्र्यांनी म्हणलें, गोंयांतल्या 3250 पैकीं 1120 महिला अपमजत गटांनी 340 कोटी रुपयांचें रीण काडलां. उरिल्ल्या आपमजत गटांक रीण मेळटलें हे खातीर गोंयांतल्या बँकांनी काम करचें. बँकांनी 900 कोटी रुपयांचें रीण दिवपाची मोख दवरची. महिला आपमजत गटांची रीण फारीक करपाची टक्केवारी 99 आसा. हे गट बायलांचे आशिल्ल्यानच बँकांची रीण रिकव्हरी बरी आसा. बायलां बदला जर दादल्यांचे आपमजत गट आसत जाल्यार रिकव्हरी खातीर बँकांक खूब त्रास जाता. खूबशे फावटी बँकांक मुजत वाडोवन दिवपाक सांगचें हे खातीर म्हाका फोन येतात. पूण महिला आपमजत गटां कडल्यान अशे फोन केन्नाच आयले नात.
तांणी म्हणलें, प्रधानमंत्री नरेंद्र मोदी हांणी अंत्योदय तत्वाचो स्विकार करून खूबश्या लोकांच्या उपेगा खातीर येवजण्यो हाडल्यात. हाका लागून फाटल्या धा वर्सांत देशांतले कोट्यांनी लोक डळडीर रेशेंतल्यान भायर आयले. राष्ट्रीय ग्रामीण उपजिविका मिशन हो तातूंतलोच एक उपक्रम आसा. हाचे वरवीं बायलांच्या विकासाची मोख दवरल्या. बायलांच्या फुडारपणा खाला विकासाचे बाबतींत लेगीत फाटलीं धा वर्सां उलयतात. गोंय सरकारान लेगीत बायलांच्या विकासा खातीर विवीध येवजण्यो हाडल्यात. गोंयांतल्या 170 अन्नपूर्णा महिला आपमजत गटांचो म्हयन्याचो वेवसाय 13 लाखां परस चड जालां.
मजगतीं, गोंय सरकार आरबीआयच्या नेमां प्रमाण डिजिटायझेशन, तंत्रज्ञानाचो वापर आशिल्ले प्रकल्प राबयत आसा. लोकांक दितात त्यो ऑनलायन सेवा आनीक बऱ्यो करपा खातीर बँकांनी नवें तंत्रज्ञान वापरून टेक सोल्युशन तयार करचें. गोंय सरकार अशें टेक सोल्युशन नक्कीच स्विकारतलें अशें मुख्यमंत्री डॉ. प्रमोद सावंत हांणी म्हणलें.
गोंयची आयात उणावली
स्वयंपूर्ण गोंय खाला गोंयांत भाजिपालो उत्पादकांक प्रोत्साहन दितात. थळावें उत्पादन वाडिल्ल्यान गोंयांत भायल्या राज्यांतल्यान येवपी भाजिपाल्याची आयात सुमार 25 टक्क्यांनी उणी जाल्या. तशेंच गोंयांत सुमार 10 टक्के भाजिपालो हेर राज्यांनी निर्यात करतात अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
