भांगरभूंय | प्रतिनिधी
पणजी : सहकार खात्याचें डिजिटायजेशन करपा सयत खातें घटमूट करपा विशीं दिल्लीत मंथन बसकेंत चर्चा जाली, अशी म्हायती सहकार मंत्री सुभाष शिरोडकार हांणी दिली. केंद्रीय सहकार मंत्री अमीत शाह हांची भेट जाली. मात राजकी चर्चा जावंक ना अशें सहकार मंत्री सुभाष शिरोडकार हांणी सांगलें.
अंदूं पुराय देशात सहकार वर्स व्हड दबाजान मनोवपाचो निर्णय जाला. सहकार चळवळ आनीक घटमूट करपाचेर चर्चा जाली. मंथन बसकेंत 25 राज्यांचे सहकार मंत्री हाजीर आशिल्ले. गोंयचो सहकार मंत्री हे नात्यान हांव हाजीर आशिल्लों. सहकार सेवा तशेंच खात्याचे डिजिटायजेशन जावपाक जाय. सहकार चळवळींतल्यान उदरगत तशेंच सामान्य मनशाक कसो लाव जातलो, हाचेर चर्चा जाली. केंद्रीय सहकार मंत्री अमीत शहा आनी हेर तज्ञांनी मार्गदर्शन केलें. बसकेंतल्या निर्णयांची कार्यवाही गोंय सरकार करतलें, अशें तांणी सांगलें.
कायदो मंत्री अालेक्स सिक्वेरा हांची हॉस्पिटलांत भेट घेवन हांवें तांचे भलायकेची खबर घेतली. मुख्यमंत्री डॉ. प्रमोद सावंत वेगळ्या कामा खातीर दिल्ली गेल्ले. म्हजी दिल्ली भेट मंथन बसके खातीर आशिल्ली, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
