भांगरभूंय | प्रतिनिधी
पणजी: मंत्रीमंडळातलो आस्पाव निश्चीत आशिल्ल्या सभापती रमेश तवडकार हांणी अधिकारी आनी समर्थकां सयत कोल्हापूरच्या महालक्ष्मी देवीचें दर्शन घेतलें. गोंयकारां खातीर शांतिकाय तशेंच समृद्धीकाय दिवपाची प्रार्थना महालक्ष्मी देवी कडेन केली अशी म्हायती सभापती रमेश तवडकार हांणी दिली.
सभापती रमेश तवडकार हे देवदेवतांचें दर्शन घेत आसात. महालक्ष्मीच्या दर्शनान तांणी देवदर्शन यात्रा पुराय केल्या. दोन सप्तकां पयलीं गोविंद गावडे हांची मंत्रीपदा वेल्यान हकालपट्टी जाली. हाका लागून मंत्रीपदाचो एक जागो खाली जाला. गोविंद गावडे हे एसटी समाजाचे फुडारी आशिल्ले. सभापती रमेश तवडकार हे लेगीत एसटी समाजाचे फुडारी आशिल्ल्यान तांचे मंत्रीपद लागीं लागीं निश्चीत जालां. सोपुतविधीचे फाटभुंयेर तांणी देवदर्शन सुरू केलां अशी चर्चा आसा. गोमंत विभूषण पुरस्कार भेटवण सुवाळ्याक लेगीत मानाचे सोयरे म्हूण तांकां निमंत्रण आशिल्लें. भलायकेंत इबाड जाल्ल्यान ते ह्या कार्यावळीक हाजीर राव शकले नात.
सभापती रमेश तवडकार हांचे सयत हेर दोगांचो सोपुतविधी जावपाचो आसा. हाका लागून राजकी घडणुकांक नेट आयला. पक्ष दिता ती जापसालदारकी आयज मेरेन हांवें पुराय केल्या. मंत्रीपदा विशीं म्हाका अजून तरी कोणेंच कल्पना दिवंक ना. आंतरीक समाधाना खातीर हांव देवदर्शन करतां अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
