भांगरभूंय | प्रतिनिधी
नवी, सुसज्ज इमारत बांदपाची नागरिकांची मागणी
म्हापशें ः कोलवाळे पुलीस स्टेशनाचें उक्तावण चार वर्सां आदीं जाल्लें. मात आजूनय सुसज्ज अशी इमारत मेळूंक नाशिल्ल्यान उदकास्त्रोत खात्याच्या दोन रावपाच्या घरांनी हें पुलीस स्टेशन कार्यरत आसा.
राज्य सरकारान थिवी मतदारसंघा खातीर विशेश अशा कोलवाळ पुलीस स्टेशनाची निर्मिती केल्ली. ते प्रमाण फाटल्या १८ जून २०२१ दिसा क्रांती दिसाक मुख्यमंत्री डॉ.प्रमोद सावंत हांचे हस्तुकीं ह्या पुलीसस स्टेशनाचें लोकार्पण जाल्लें. २०१९त सरकारान बार्देश म्हालांतल्या ह्या नव्या पुलीस स्टेशनाक मंजूरी दिल्ली.
मुशीरवाडो कोलवाळेच्या उदकास्रोत खात्याच्या, वापरी नाशिल्ल्या रावपाच्या घरांत हंगामी स्वरूपाचें हें पुलीस स्टेशन सुरू केल्लें. ह्या पुलीस स्टेशना खातीर बेगीनूच नवी इमारत उबारतले, अणी घोशणा उक्तावणा वेळार मुख्यमंत्री डॉ. सावंत हांणी केल्ली.
हें पुलीस स्टेशन मंजूर जाले उपरांत सरकान गृहनिर्माण मंडळाच्या कोलवाळेच्या बांदकाम प्रकल्प इमारतींत तें सुरू करपाचो विचार केल्लो. ही सुवात योग्य नाशिल्ल्यान जमीन संपादीत करून पुलीस स्टेशना खातीर इमारत उबारपाचेर विचार जालो. मात हे खातीर बरोच वेळ वचपाचो आशिल्ल्यान सद्याचे सुवातेर हंगामी स्वरूपांत पुलीस स्टेशन सुरू करपाक मान्यताय दिली. उपरांत पुलीस स्टेशना खातीर नवे इमारतीच्यो प्रक्रिया मुखार सरूंकच ना. फाटल्या चार वर्सां सावन अपुर्ण पडपी आनी जायत्यो सुविधा नाशिल्ल्या सुवातेचेर हें पुलीस स्टेशन उबें आसा.
विसवा खातीर बॅरेक तशेंच हेर गरजेच्यो सुविधा उपलब्ध नात. हांगचे पुलीस कर्मचारी वर्ग सध्या परिस्थिती कडेन जुळून घेतात. मात बायलां कर्मचार्यांक ही परिस्थिती जुळून घेवपाक आडखळ निर्माण जाता. तशेंच ह्या पुलीस स्टेशना कडेन जुळिल्ल्या थिवी मतदारसंघांतल्या कोलवाळ, रेवोडा, नादोडा, पीर्ण, अस्नोडा, सिरसय, थिवी आनी कामुर्ली ह्या आठ पंचायत क्षेत्रातल्या लोकांक पुलीस स्टेशनांतल्या अपूर्ण पडपी सुविधांक तोंड दिवचें पडटा. हाका लागून तांणी स्वतंत्र इमारत बांदपाची मागणी केल्या.
कोलवाळ पुलीस स्टेशनाची सध्याची सुवात कोलवाळ मध्यवर्ती बंदखणीची सुवात जावन आसा. केंद्र सरकारान ही सुवात रिकामी करपाचे निर्देश राज्य सरकाराक दिल्यार हें पुलीस स्टेशन थंयच्यान थंयच्यान काडून ती कारागृह प्रशासनाक दिवची पडटली. हाका लागून कोलवाळ पुलीस स्टेशना खातीर सरकारान वेळार पर्यायी सुवातेचें नियोजन करप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
