भांगरभूंय | प्रतिनिधी
पणजी : धारगळे ॲसीड हल्ल्या गंभीर जखमी जखमी जाल्लो १७ वर्सां पिरायेचो भुरगो आजूनय वेंटीलेटराचेरूच आसा. आतां तो उपचारांक प्रतिसाद दिवपाक लागला. ताचेर प्लास्टिक सर्जरी केल्या, अशी म्हायती गोंय वैजकी महाविद्यालय हॉस्पिटलाचे वैजकी अधीक्षक डॉ. राजेश पाटील हांणी दिली.
डॉ. युरी डायस हांच्या मार्गदर्शना खाला दोतोरांचो पंगड तांचेर उपचार करतात. तशेंच ताचे भलायकेचेर लक्ष दवरून आसात, अशेंय डॉ. राजेश पाटील हांणी म्हणलें. तो शुद्धीचेर जरी आयला तरी तो आजून उलोवपाचे अवस्थेंत ना. ताचे भलायकेंत सुदारणां जाले उपरांत फुडले उपचार करतले, अशी म्हायती दोतोरांनी दिली.
धारगळे सोमारा सकाळीं एका १७ वर्सां पिरायेच्या भुरग्याचेर ॲसीड हल्लो जाल्लो. पुलिसांनी रोखडोच दुबावीत नीलेश गजानन देसाय (कळणे – दोडामार्ग) हाका अटक केल्ली. हे विशीं पुलीस फुडलो तपास करतात.
गंभीर अवस्थेंतूच त्या भुरग्याक म्हापशें जिल्लो हॉस्पिटलांत उपचारा खातीर दाखल केल्लो. उपरांत ताका गोमेकॉंत धाडलो. ताचे दोळेे, गाल, नाक लाशिल्ल्यान विवीध तज्ञ दोतोर ताचेर उपचार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
