भांगरभूंय | प्रतिनिधी
संगारेड्डी, खबरां संस्था: तेलंगणाच्या संगारेड्डी जिल्ह्यांतल्या वखदां कारखान्यांत जाल्ल्या स्फोटांतल्या मरण आयिल्ल्यांचो आंकडो ३४ चेर पावला. कारखान्यांतल्यान ३१ कुडी भायर काडल्यो. तेन्नाच हॉस्पिटलांत ३ जाणांक मरण आयलें. ३० परस चड जाण जखमी जाले.
पसुमिल्लाराम उद्देगीक मळावेल्या सिगाची इंडस्ट्रीजांत सकाळीं ८:१५ ते ९:३० च्या मजगतीं हो अपघात जालो.
आयजी व्ही सत्यनारायण हांणी म्हणलें, घडणुके वेळार कारखान्यांत १५० लोक आशिल्ले, जंय स्फोट जालो थंय ९० लोक हजर आशिल्ले.
तांणी सांगलें, एनडीआरएफ, डीआरएफ, एसडीआरएफच्या पंगडा सयत उजो पालोवपी दळाच्या १० गाडयो हजर आशिल्ल्यो. स्फोटाचीं कारणा तपासतात. भट्टींत रोखडेंच रसायनीक अभिक्रियेक लागून स्फोट जाल्ल्याची शक्यताय उक्तायली.
मजगतीं, प्रधानमंत्री मोदींनी एक्स पोस्टद्वारे स्फोटाचे घडणुकेचेर दुख्ख उक्तायलें. तांणी प्रधानमंत्री राष्ट्रीय मदत निधींतल्यान मरण आयिल्ल्यांच्या कुटुंबियांक रु. २ लाख आनी जखमींक ५० हजारांची मदत जाहीर केली.
सकाळीं ७ वरांचेर रातची शिफ्ट सोंपतकच भायर सरलो अशें एका कामगारान सांगलें. सकाळचे शिफ्टीचे कामगार पयलींच भितर आयिल्ले, सकाळीं ८ वरांचे सुमाराक हो स्फोट जालो. शिफ्टांत मोबायल फोन सांठोवन दवरतात, देखून भितर काम करपी लोकां विशीं कसलीच खबर मेळूंक ना.
प्रत्यक्षदर्शींनी सांगिल्ल्या प्रमाण, हो स्फोट इतलो भिरांकूळ आशिल्लो, थंय काम करपी कामगार सुमार शंबर मीटर अंतराचेर उसळून पडले. ह्या स्फोटाक लागून रिएक्टर युनिट नश्ट जालो.
चडशे कामगार मध्य प्रदेश, उत्तर प्रदेश, बिहार, ओडिशा आनी अस्तंत बंगालांतले आसात अशें कंपनीच्या एका कर्मचार्यान सांगलें. एका शिफ्टांत ६० परस चड कामगार आनी हेर ४० कर्मचारी काम करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
