भांगरभूंय | प्रतिनिधी
जोयडा ः गोंय-बेळगांव मार्गावेलो जांबोटी लागसार आशिल्लो कुसमळी पूल मोटारी आनी दुचाकी वाहनां येरादारी खातीर उक्तो केलां. कर्नाटकाचे येणावळ मंत्री कृष्ण भैरेगौडा हांणी बेळगांव- चोर्ला- गोंय मार्गावेल्या कुसमळी मलप्रभा न्हंयचेर आशिल्ल्या नव्या पुलाची पळोवणी केली आनी सोमारा सांजवेळा सावन तो दुचाकी आनी मोटार वाहनां खातीर उक्तो केलो. पूण पुलाचें काम पुराय जाय मेरेन स चाकी आनी जड वाहनां खातीर हो पूल बंद उरतलो अशी म्हायती बेळगांव जिल्लो प्रशासनान दिल्या.
बेळगांव आनी गोंयांक जोडपी सगळ्यांत लागचो रस्तो म्हूण जायते जाण बेळगांव – चेर्ला – गोंय मार्ग वापरतात. पूण कुसमळी मलप्रभा न्हंयेवेल्या नव्या पुलाचें काम चालू आशिल्ल्यान पावसाच्या वेळार बांदिल्लो पर्यायी पूल तीन फावटीं उदकान व्हांवून गेल्ल्यान ह्या मार्गाचेर येरादारी बंद आशिल्ली.
सध्या नव्या पुलाचें काम निमाण्या पांवड्यार पावला. पुलाचो स्लॅब पुराय जाल्ल्यान सोमारा सांजवेळा सावन ह्या पुलाचेर दुचाकी आनी मोटारी वाहनांची येरादारी सुरु केल्या. मजगतीं, ह्या पुलाचें उरिल्लें काम बेगीनांत बेगीन पुराय करपाची सुचोवणी मंत्री भैरेगौडा हांणी कंत्राटदाराक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
