भांगरभूंय | प्रतिनिधी
विजय सरदेसाय : बार्देंस उत्तर भारतीयांच्या ताब्यांत गेल्ल्याचो दावो
भांगरभूंय । प्रतिनिधी
म्हापशें : बार्देस म्हालांतले गोंयकार आनी गोंयकारपण धोक्यांत आयलां. कोलवाळच्या राम मंदिराचें अस्तित्व लेगीत धोक्यांत आयलां. जे लोक प्रभू श्रीरामाच्या नांवाचेर वेंचून आयले, ते आयज प्रस्तावीत रस्तो रुंदीकरणाच्या आनी न्यायालयाच्या आदेशाच्या नांवान थळावें राम मंदीर मोडपाक फुडें सरल्यात. भाजपाचो हो चेरो आमी उजवाडाक हाडटले, अशें आस्वासन गोवा फॉरवर्डाचे अध्यक्ष आमदार विजय सरदेसाय हांणी बार्देसकारांक दिलें.
सोमारा 30 जूनाक ‘आमचो आवाज विजय’ ह्या बावट्या खाला आमदार सरदेसाय हांणी म्हापशेंच्या म्हापसा रेसिडेन्सी सभाघरांत बार्देसांतल्या लोकांच्यो समस्या आयकून घेतल्यो. ह्या वेळार आदले आमदार किरण कांदोळकार, गोवा फॉरवर्डाचे फुडारी संतोषकुमार सावंत, दीपक कळंगूटकार आनी दुर्गादास कामत हाजीर आशिल्ले.
किरण कांदोळकार हांणी थिवी मतदारसंघांतल्यो समस्या आमदार सरदेसाय हांच्या कानार घातल्यो. तशेंच विधानसभा अधिवेशनांत हाचेर आवाज काडपाची मागणी केली.
आमदार सरदेसाय हांणी सांगलें, येता त्या विधानसभा अधिवेशनांत बार्देसांतल्या लोकांचे प्रस्न आनी मुद्दे उपस्थीत करतले. सध्या उच्च न्यायालयाच्या आदेशाचो दुरुपेग करून थळाव्या लोकांक राज्य सरकार भेश्टोवपाक सोदता. लोकांक विस्वासांत घेनासतना हम करे सो कायदा, अशी दादागिरी सुरू आसा. बार्देस म्हालांत गोंयकारपण उणें जायत आसा. थळाव्यांनी मुखार सरून आमी जिवीत आसात, हें सरकाराक दाखोवपाची गरज आसा. फक्त एकाच राजकी पक्षाच्या फाटल्यान वा त्या पक्षाचे भक्त जाले जाल्यार थंयच्या देवदेवतां सयत स्वताचें अस्तित्व बार्देसकारांचें अस्तित्व धोक्यांत येतलें. थळावे गोंयकार उणें जाले जाल्यार बार्देसाचें हरियाणा, बिहार जातलें, अशें सरदेसाय हांणी सांगलें.
बार्देस म्हाल उत्तर भारतीयांच्या ताब्यांत गेला. चिखली, कोलवाळच्या खाजगी रान वाठारांत खुराणा नांवाचे व्यक्तीन मेगा प्रकल्प चालीक लायला. हो प्रकार आमी खपोवन घेवचे नात. सरकार आनी लोकप्रतिनिधींचो हातूंत आस्पाव आशिल्ल्याचें दिसल्यार तांकां उक्ते करतले. हे विशीं विधानसभा अधिवेशनांत आमी आवाज काडटले. हो प्रकार म्हणल्यार लोकसंख्याशास्त्र नश्ट करपाचें कारस्थान आसा, असो आरोप सरदेसाय हांणी केलो.
पर्यटक टॅक्सी परवान्यांचेर उपाय काडपाचें उतर
पर्यटक टॅक्सी परवान्याचेर अंकूश आसचो. टॅक्सी भाड्यांत स्पश्टता आसची. ते खातीर मोटर वाहन कायद्यांत दुरुस्ती करची, अशी थळाव्या टॅक्सीकारांनी आमदार सरदेसाय हांची भेट घेवन मागणी केली. कायद्याच्या दिश्टीकोनांतल्यान अभ्यास करून सरकाराच्या आदारान हाचेर उपाय काडुया, अशें उतर सरदेसाय हांणी टॅक्सीकारांक दिलें.
‘म्हापशें पालिका करता संस्थात्मक भ्रश्टाचार’
म्हापशें नगरपालिका ही स्वताच्या भाडेकारां कडल्यान घरभाड्या सयत घरपटी घेवन संस्थात्मक भ्रश्टाचार करता. हो प्रकार फक्त म्हापश्यांच घडपाक शकता, अशी टिका आमदार विजय सरदेसाय हांणी केली. म्हापशें पालिकेच्या भाड्या सयत घरपटी वसुलीचो मुद्दो अॅड. महेश राणे हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
