फुडले पंद्रशेंत रायबंदर – चोडण मार्गार धांवतली रो-रो फेरी

भांगरभूंय | प्रतिनिधी

न्हंय येरादारी खातें : पर्यटकां खातीर नवें शुल्क

भांगरभूंय । प्रतिनिधी

पणजीः नवे रो-रो फेरींत पर्यटकांक आतां शुल्क लागू जातलें. पर्यटक जे मोटारी घेवन येतात तांकां 100 ते 300 रुपया लागू जातले. तशेंच जे पर्यटक फक्त रो-रो फेरींत जलसफरीचो आनंद घेवपाक सोदतात तांचे खातीर दर पर्यटका फाटल्यान 50 रुपया घेतले. फुडल्या 10 दिसां भितर रो-रो फेरी रायबंदर – चोडण मार्गार धांवतली, अशी म्हायती न्हंय येरादारी खात्याचे संचालक विक्रम राजेभोसले हांणी दिली.

रो-रो फेरी विशीं चोडणकारांचे कांय प्रस्न आनी विशय आशिल्ले. तांच्यो जापो आनी स्पश्टीकरण मागपा खातीर चोडणाच्या थळाव्या लोकांनी न्हंय येरादारी खात्याचे संचालक विक्रमसिंह राजेभोसले हांची भेट घेतली. भेटी उपरांत राजेभोसले पत्रकारां कडेन उलयताले.

चोडण-रायबंदर मार्गार दोनूय वटांनी यो-वच करपा खातीर दरेकी दोन रो-रो फेरी आसतल्यो. हे फेरी खातीर आमी वेगवेगळ्या गाडयां खातीर वेगवेगळे दर थारायल्यात. कांय दिसांनी हे विशींची अधिसुचोवणी उजावाडाक येतली, अशें राजेभोसले हांणी सांगलें.

दुचाकी आनी चलत प्रवास करपी लोकांक फुकट सेवा मेळटली. पास आशिल्ल्या मोटारींक दर ट्रीप आतां 10 रुपया आसा आनी आतां तातूंत वाड करून 15 रुपया शुल्क लायतले. ज्या मोटारीं कडेन पास ना तांकां दर ट्रिपीक 30 रुपया आनी मिनी ट्रकांक सध्या 20 रुपया घेतात आनी रो-रो फेरींत तांकां 100 रुपया घेतले, अशें राजेभोसले हांणी सांगलें.

तशेंच पर्यटकांक नवें शुल्क लागू केलां. जे रेंट अ कार घेवन येतात तांकां 100 रुपया आनी जे पर्यटक आपली स्वताचे मालकीची मोटार घेवन येतात तांचे 300 रुपया घेतले. तशेंच रो-रो फेरींत जलसफरीचो आनंद पर्यटकांक दिवपा खातीर आमी 50 रुपया घेवपाचें थारयलां. हे सगळे दर सरकारान थारयल्यात, अशीय म्हायती राजेभोसले हांणी दिली.

फक्त जलसफरीचे आनंद घेवपाक येवपी पर्यटकांचे पयशे घेतले, गोंयकारांक ही सेवा मुफत आसतली. रोरो फेरी क्रुझा परस सोयिस्कर आनी बरी धांवता. देखून पणजे 500 रुपया दिवन क्रूझ बोटींत जलसफरीचेर मोडचे परस लागींच रायबंदर येवन रो-रो भितर वचपाक यत्न करतले अशें आमकां दिसता. हें जायत जाल्यार ते वरभर फेरींत रावून जुंव्यार रावपी लोकांक त्रास करपाक शकतात. हे बोटीच्या कॅबिनांत एसी आसा, टॉयलेट सुविधा आसा. देखून खात्याक येणावळ येवची ह्या हेतून पर्यटकांचे 50 रुपया शुल्क घेवपाचे थारयलां, अशें राजे भोसले हांणी सांगलें.

सकाळीं 7 ते रातच्या 8 वरां मेरेन रो-रो फेरी चलतल्यो. रातचीं 9 ते सकाळीं 7 वरां मेरेन साद्यो फेरीबोटी चलतल्यो. 16 मोटारी आनी 40 दुचाकी व्हरपाची तांक हे रो-रो फेरीची आसा. येता त्या 10 दिसां भितर आमी रो-रो फेरी सुरू करपाक शकतात आनी उक्तावणाचे तारखेची आमी सरकार कडल्यान वाट पळयतात, अशें राजेभोसले हांणी सांगलें. रो-रो फेरी कितल्यो चलतल्यो, कितल्यो तेंप चलतलो आनी जुंवेंकारां खातीर विशेश वेळ कसो आसतलो, आमकां दर कितलो आसतलो हे आमचे प्रस्न आशिल्ले. आमकां समाधानकाराक जापो मेळ्ळ्यात आनी जीं आस्वासनां दिल्यांत तीं पाळटतले अशी आमकां आस्त आसा, अशें चोडणेच्या थळाव्यां लोकांनी सांगलें.