भांगरभूंय | प्रतिनिधी
पर्यावरण, परंपरा सांबाळपाचो हडफडें – नागवा पंचायतीचो उलो
भांगरभूंय । प्रतिनिधी
म्हापशें : प्लास्टर ऑफ पॅरीसच्या (पीओपी) गणेश मुर्तीची खरेदी वा पुजेक लायनासतना पर्यावरणपूरक मातयेचे गणेश मुर्तीची पुजा करची, असो उलो हडफडें – नागवा पंचायतीन येता ते चवथीचे फाटभुंयेर लोकांक मारला. सैम – परंपरेक हय म्हणात आनी पीओपी मुर्तींक ना म्हणात, अशी घोशणा दिवन सरपंच रोशन रेडकार हांणी भौशीक सुचोवणी नोटीस जारी केल्या.
पीओपी मुर्ती पर्यावरणाक आनी भलायकेक गंभीर धोको निर्माण करतात, पीओपीक लागून सैमीक संसाधनांचें लुकसाण आनी प्रदुशण जाता. हें लुकसाण भरचे खातीर खूबशीं दसकां यत्न करचे पडटात, हें तुमचे नदरेक हाडून दितात. ताका लागून पंचायत सगळ्यांक पर्यावरणपूरक मातयेच्यो मुर्ती वेंचच्यो हे खातीर उर्बा दिता, जे वरवीं आमचें पर्यावरण सांबाळपाक मजत जातली. तेचवरी आमचे पोरणे परंपरेक आनी थळावे कारागिरीक लेगीत तेंको मेळटलें. हे खातीर आमी सगळ्यांनी एकठांय येवन आमच्या पर्यावरणाचो सांबाळ करपाक, पीओपी मुर्तींचेर बहिश्कार घालपाक सैमाक हय म्हणात, परंपरेक हय म्हणात, पीओपी मुर्तींक ना म्हणात, असो उलो हे नोटिसे वरवीं मारला.
5 ते 10 हजारांचो दंड
जर कोणूय पीओपी मुर्ती विकता वा तिची पुजा करता अशें दिसल्यार, अश्या दोशींचेर पंचायत मुर्तीच्या आकारा प्रमाण 5 ते 10 हजारां मेरेन दंड दितली, अशी शिटकावणी नोटिशें वरवीं पंचायतीन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
