भांगरभूंय | प्रतिनिधी
संरक्षणमंत्री राजनाथ सिंहा सयत मेळटले केंद्रीय मंत्र्यांक
पणजी : राज्यांत मंत्रिमंडळ फेरबदलाची चर्चा चालू आसतनाच मुख्यमंत्री डॉ. प्रमोद सावंत हे आयज, सोमारा दिल्लीक गेले. मुख्यमंत्र्यांची दिल्ली भेट पूर्वनियोजीत आशिल्ल्यान केंद्रीय संरक्षणमंत्री राजनाथ सिंह, गृहमंत्री अमित शहा, पक्षाचे सरचिटणीस बी. एल. संतोष आनी हेर फुडार्यांक ते मेळटले. विवीध खातीं तशेंच पक्षाच्या कार्या विशीं ते केंद्रीय फुडार्यां कडेन चर्चा करतले अशें प्रदेश अध्यक्ष दामू नायक हांणी सांगलें.
मंत्रिमंडळ फेरबदल हो मुख्यमंत्र्यांच्या अखत्यारींत येवपी विशय. मंत्रिमंडळ फेरबदलाविशीं मुख्यमंत्रीच निर्णय घेतले अशें तांणी म्हणलें.
महायज्ञाक भेट
पणजेच्या महालक्ष्मी देवळांत विद्याकोटी कुंकुमार्चन महायज्ञ सुरू आसा. कुंकुमार्चन महायज्ञाला भेट दिले उपरांत पत्रकारां कडेन उलयतना प्रदेश अध्यक्ष दामू नायक हांणी ही म्हायती दिली. ह्या वेळार तांचे वांगडा आदले केंद्रीय मंत्री तशेंच भाजपाचे फुडारी शहानवाज हुसेन हजर आशिल्ले. हुसेन हांणीय सुद्धा कुंकूमार्चन महायज्ञाक भेट दिली.
गोविंद गावडे हांचें मंत्रिपद गेले उपरांत मंत्र्याची एक सुवात रिकामी जाल्या. ही सुवात भरपा वांगडा आनीक दोगांक मंत्रिपद दिवपाच्यो हालचाली सुरू आसात. हाका लागून मुख्यमंत्री डॉ. प्रमोद सावंत हांची दिल्ली भेट सध्या चर्चेक आयल्या.
भलायकी मंत्रीय दिल्लीक
भलायकी मंत्री विश्वजित राणे दिल्लीक आसा. आपल्या खात्या कडेन संबंदीत कामा निमतान ते दिल्लीक गेल्यात, अशी म्हायती दामू नायक हांणी विश्वजित राणे हांचे दिल्ली भेटी विशीं उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
