भांगरभूंय | प्रतिनिधी
दोडामार्ग, खबरां संस्था: मिस्टर, सि अँड मिसेस रॉयल ग्लोबल किंग अँड क्वीनच्या सीझन ५ त विशेश क्विन्स श्रेणींतल्या ‘मिस इंडिया फॅब्युलस २०२५’ची जैतिवंत थारली होंडा-सत्तरीची सुप्रिया सुर्याजी देसाय. सुपिळा मूळ पाल (कुडाशें खुर्द पुनर्वसन) ह्या तिळारी धरणाक लागून विस्थापीत जाल्ल्या गांवचें. मात तिचो बापूय नोकरे निमतान गोंयांत आयलो आनी तीं गोंयकार जालीं.
डॉ. नीलम पराडिया हांणी द टोपाझ इव्हेंट्सच्या सहकार्यान घोव कल्पेश पराडिया हांच्या फाटबळान, मिस्टर मीस अँड मिसेस रॉयल ग्लोबल किंग अँड क्वीन २०२५चे रॉयल ग्लोबल अचीव्हर अवॉर्ड्स सीझन ५चें आयोजन केल्लें. अंदूं ‘रॉयल ग्लोबल कपल’चो शुभारंभूय जालो. सुवाळो २१ आनी २२ जुनाक मुंबयच्या क्लब एमराल्डांत आयोजीत केल्लो. हातूंत भारता सयत युके, सिंगापूर, युएई, श्रीलंका आनी नेपाळच्या सर्तकांचो आसपाव आशिल्लो.
पयल्या दिसा कार्यावळीचें उक्तावण जाले उपरांत प्रतिश्ठीत आंतरराष्ट्रीय प्रशिक्षकाच्या नेतृत्वाखाला प्रशिक्षण सत्रां जालीं, हातूंत मोलादीक कुशळटाय आनी अंतदृश्टी दिली. निवड जावचे खातीर बहुप्रतिक्षीत परिचय फेरी, प्रतिभा फेरी आनी प्रस्नोत्तरांचो आसपाव आशिल्लो. बॉलिवूड अभिनेत्री एलेना तुतेजा, सुपरमॉडेल क्रमिक यादव, बॉलीवूड अभिनेतो अली खान, ताहीर कमाल खान, कबीर सिंग राजपूत, डॉ. अर्चना चौधरी, श्याजमी हुसेन (सिंगापूर) , अर्पिता मिश्रा आनी प्रियांका राजपूत हांणी ज्युरी म्हणून काम पळयलें.
सुप्रिया देसाय ही पदवीधर, तशेंच आंतरराष्ट्रीय मॉडेल. डान्सींग, ट्रॅव्हलींग, मॉडेलींग तिका आवडटा. ल्हानपणा सावनूच रॅम्प वॉक आनी फोटोशूट करप हें तिचें सपन. दिल्लीक २०२२त ती मॉडेलिंगांत पयली उपजैतिवंत म्हणून, २०२२ वर्सा नवी मुंबयक भारत शक्तीमान पुरस्कार तिका फावो जालो.
देश आनी आंतरराष्ट्रीय पांवड्यार जायत्या कार्यावळींनी ती वाटेकार जाल्या. तिका मॉडेलींग मळार ३ वर्सांचो अणभव आशिल्ल्यान, ह्या मळारूच तिका अरिअर घडोवपाचें आसा. तिच्या येसाचें श्रेय ती आपल्या पालकांक दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
