भांगरभूंय | प्रतिनिधी
पणजीः उस्मानाबादच्यान पणजे येवपी हिरकणी ह्या एसटी बसीचो ३० जुनाक सकाळीं गोंयां लागसार बांदा, पानवळ गांवांतल्या वोल्तार अपघात जालो. मुखरच्यान येवपी दुसरे एसटी बसीची आनी उस्मानाबादच्यान येवपी हिरकणी बसीचो एकामेका मुखार धपको बसलो. ह्या अपघातांत चालक, वाहक आनी विद्यार्थ्यां सयत वट्ट १९ प्रवासी जखमी जाले. तांकां बांदा मुळाव्या भलायकी केंद्रांत उपचारा खातीर व्हेल्यात.
दोडामार्ग म्हालांतल्या फुकेरी गांवांतल्यान बांद्याच्या दिकेन येवपी एसटी आनी उस्मानाबादच्या पणजे दिकेन येवपी एसटी पानवळ गांवां लागसार पावतांच फुकेरीच्यान आयिल्ल्या बस चालकान ती कंट्रोल करपाचो यत्न केलो. मात दोनूय बसी एकामेका मुखार आपटल्यो. ह्या अपघातांत फुकेरीची एसटी १०० फुटां मेरेन झरत गेली. हातूंत दोनूय बसींच्या फुडल्या भागाचो खिळखिळो जालो.
ह्या अपघाताची म्हायती मेळटांच थळाव्या नागरिकांनी घडणुके सुवातेर वचून जखमींक रोखडेच बांदा मुळाव्या भलायकी केंद्रांत उपचारा खातीर दाखल केले. रोखडीच मजत मेळिल्ल्यान कोणाक कांय जावंक ना. ह्या अपघातांत चालक, वाहक आनी विद्यार्थ्यां सयत वट्ट १९ प्रवासी जखमी जाल्यात.
ह्यो दोनूय बसी रस्त्याच्या मदींच आडकल्ल्यान पानवळ वाठारांत कांय काळा खातीर येरादारी ठप्प जाल्ली. अपघाता उपरांत पुलिसांनी बेगोबेग आनी एसटी प्रशासन घडणुके सुवातेर येवन येरादारी सुरळीत केली. सध्या अपघातांतल्या जखमींचेर उपचार सुरू आसात. कांय जाणांक गंभीर दुखापतूय जाल्ल्याची म्हायती आसा. ह्या अपघाताचो फुडलो तपास पुलीस आनी एसटी प्रशासन करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
