भांगरभूंय | प्रतिनिधी
केन्ना जनेलांचे हारशे, जाल्यार केन्ना सिटांच गायब
मडगांव : फाटल्या कांय काळा सावन कदंबाच्या बसींतल्यान प्रवास करपी प्रवाशांक विवीध त्रासांक तोंड दिवचें पडटा. चार दिसां आदीं मडगांव- पणजी मार्गावेले बसीच्या जनेलाच्या ग्लासा बदला प्लास्टीक लायिल्लें. आतां मडगांव पणजी मार्गावेल्या शटल बसीचें सिटूच गायब आशिल्ल्याचें दिसून आयलें. हे विशीं ’गोवा कॅना’न दखल घेवन जिल्लोधिकारी, येरादारी खात्या सयत गिरायक मंचाकडेन कागाळ करतले अशी म्हायती मेळ्ळ्या.
कदंब महामंडळान प्रवाशां खातीर ’म्हजी बस’ येवजण नेटान सुरू केल्या. मात, कदंब महामंडळा कडेन बसीचो उणाव आशिल्ल्यो आदल्यो बसी दुरुस्त करून परत प्रवाशांक हाडपा खातीर धाडटत. प्रवाशां खातीर बस उपलब्ध करून दितना डेपोंत तांची तपासणीय जायना अशें उक्तडार आयलां.
मजगतीं, मडगांव ते पणजी मार्गार धांवपी कदंबाचे बसींत २६ जुनाक गाडयेच्या जनेलासो हारसो फुटिल्लो. थंय प्लास्टीकची कापेत लायिल्ली. पावसाचें उदक तातूंतल्यान भितर आयिल्ल्यान प्रवासी भिजपाचोय प्रकार घडिल्लो. हे घडणुके उपरांत नागरिकांनी आनी प्रवाश्यांनी कदंबाच्या कामोर प्रस्न करून तिडक उक्तायल्ली.
मडगाव-पणजी बसीचें सीट गायब
हे घडणुकेक कांय दीस जाले उपरांत आयज, सोमारा परत मडगांवच्यान पणजेचे दिकेन सोडपी शटल बसींतलीं कांय सिटांच गायब आशिल्ल्याचें दिसून आयलें. हाची गोवा कॅनान दखल घेतल्या. नागरी पुरवण आनी गिरायक वेव्हार विभागाकडेन गिरायक संरक्षण कायद्यां खाला कागाळ करतले. तशेंच दक्षीण गोंय जिल्लोधिकारी आनी येरादारी संचालनालया कडेनूय गिरायकांक जावपी समस्ये विशीं कागाळ करतले, अशें गोवा कॅनच्या लोर्ना फर्नांडीस हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
