भांगरभूंय | प्रतिनिधी
आमदार कृष्णा साळकार : पांयपूल बंद दवरिल्ल्यान विचारलो जाब
भांगरभूंय । प्रतिनिधी
वास्को : मुरगांव बंदर प्राधिकरण (एमपीए) वास्को जें करता तें बरोबर ना. मनाक दिसता थंय गेट घालता, मनाक दिसता तें बंद करता. ‘एमपीए’न आमकां विकते घेतला काय कितें, असो प्रस्न वास्कोचे आमदार कृष्णा साळकार हांणी शुक्रारा 27 जूनाक उपस्थीत केलो.
वास्कोच्या आयओसी चौकांतलो उड्डाण पांयपूल दुरुस्ती खातीर तात्पुरतो बंद करपाचो निर्णय घेवन ‘एमपीए’न तो बंद करपाची कार्यवाही सुरू केल्या. ‘एमपीए’न तो पूल तत्काळ परतून सुरू करचो. ‘एमपीए’न लोकांचे पासियेंस पळोवचें न्हय, अशें साळकार हांणी म्हणलां.
देस्तेरोवाडो आनी भोंवतणच्या लोकांक आदीं एमपीटीच्या वाठारांतल्यान रेल्वे मार्ग हुपून शार वाठारांत येवचें पडटालें. एमपीटीन सुरक्षे खातीर थंय गेट उबारून सुरक्षा रक्षक दवरले उपरांत थंयच्या लोकांक व्हड भोंवताडो मारून येवचें पडटालें. हाचेर आवाज काडले उपरांत देस्तरोवाडो ते आयओसी चौक हाचे मदीं एक उड्डाण पांयपूल बांदलो. ताका लागून लोकांची समस्या पयस जाल्ली. ह्या पुलाचो एक भाग मुरगांव मतदारसंघांत जाल्यार दुसरो भाग वास्को मतदारसंघांत आसा. ह्या पुलाचे दुरुस्ती संबंदांत ‘एमपीए’न थंय नोटीस तकटो लायला. हो पूल असुरक्षीत जाल्ल्यान दुरुस्ती आनी देखभाल कामा खातीर 20 जूना सावन तो तात्पुरतो बंद दवरतले. लोकांनी पर्यायी मार्गाचो वापर करचो, अशें तकट्या वयले नोटिशेंत म्हणलां. प्रत्यक्षांत 20 जूना बदला 27 जूनाक दुरुस्तीकाम हातांत घेतलें. हाची म्हायती मेळटाच, आमदार साळकार, मुरगांवचे नगराध्यक्ष गिरीश बोरकार हांणी थंय वचून संबंदीत अधिकाऱ्याक जाब विचारलो.
मुरगांव पालिकेक म्हायती दिनासतना ‘एमपीए’न स्वता हो व्हड निर्णय घेतला. हाचे फाटली ‘एमपीए’ची भुमिका कितें आसा? उपजिल्होधिकारी, मामलेदार, मुरगांव पालिका, लोकप्रतिनिधी आसात. तांकां विस्वासांत घेनासतना, एमपीए अशे तरेची कृती करपाक शकना. जर हो पूल असुरक्षीत जाला जाल्यार ताची म्हायती आमदाराक दिवपाची गरज आशिल्ली. एमपीए कितलीय व्हड आसूं, तांणी मनमानी बंद करची, अशें साळकार हांणी स्पश्ट केलें. हो पूल कितले दीस बंद आसतलो, हेंवूय स्पश्ट करूंक ना. हो पूल सप्ताच्या दिसांनी चड वापरतात. वास्को सप्ता आदीं हो पूल दुरुस्त जातलो काय ना? जर जावचो ना जाल्यार सगल्यांक विस्वासांत घेवन सप्ता उपरांत पुलाचें दुरुस्तीकाम हातांत घेवप योग्य थारतलें, अशें आमदार साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
