भांगरभूंय | प्रतिनिधी
माशेल : आखाड्या वयल्या एकोडी पुलाच्या रस्त्यार सुमारा भायर फोंडकुलां पडल्यांत. पावसाचें उदक फोंडकुलांनी भरले उपरांत वाहन चालकांचे ह्या रस्त्या वयल्यान गाडी चलोवप त्रासाचें जाता. ह्या रस्त्याचेर कोणूच लक्ष दिनात, हे खातीर वाहन चालकांनी खर तिडक उक्तायल्या.
हो पूल 2005 त तेन्नाचे आमदार तशेंच येरादारी मंत्री पांडुरंग मडकयकार हांचे कारकिर्दींत येरादारीक उक्तो जाल्लो. हाका लागून आखाड्या वयल्या लोकांक एक सुविधा मेळिल्ली. फाटल्या कितलीशींच वर्सां जालीं, ह्या पुला वयल्या रस्त्याचें डांबर व्हांवून गेलां. अदींमदीं रस्त्याचेर सिमेंटाचे ठिगळ्यो मारून दुरुस्ती करतात, पूण दर पावसांत पुरयल्ली फोंडकुलां हेर फोंडकुलां सयत वयर सरतात.
आखाड्या वयलें श्री ब्रह्मेश्वर युवक मंडळ फाटल्या कितल्याच वर्सां सावन चवथी निमतान 21 दीस चित्रां श्री पांडुरंग देवस्थानाचे माचयेर करता. कोरोना काळांत ते बंद आशिल्ले पूण ते उपरांत ते परतून सुरू जाले. हीं चित्रां पळोवपा खातीर गोंयांतल्यान तशेंच शेजारच्या राज्यांतल्यान हजारांनी लोक येतात. ते खातीर फाटलीं कितलीशींच वर्सां श्री ब्रह्मेश्वर युवक मंडळाचे पदाधिकारी ह्या पुलाचेर सिमेंट घालून तीं फोंडकुलां पुरयतात. एकदां आमदार राजेश फळदेसाय हांच्या यत्नांत तीं फोंडकुलां पुरयल्लीं. सध्या ह्या पुलाचेर खूब फोंडकुलां पडल्यांत. भौशीक बांदकाम खात्याच्या अधिकाऱ्यांनी ह्या प्रकरणांत ताकतिकेन लक्ष घालून तीं पुरोवचीं, अशी मागणी थळाव्या लोकां वांगडाच वाहन चालकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
