भांगरभूंय | प्रतिनिधी
मुरगांव पालिका मंडळाचे बसकेंत अधिकार्यांनी दिली म्हायती
वास्को: पावसांत खंय उदक सांठून उरलां, खंय येरादारी कोयंडी जाल्या, कितल्या विक्रेत्यां कडेन परवाने आसात, कितलीं नवीं बांदकामां आयल्यांत, अश्या गजालींची म्हायती एका क्लिकाचेर मेळटली. हे विशीं मुरगांव पालिका मंडळाचे बसकेंत चित्रगुप्त अर्बन टेक्नालॉजीजच्या अधिकार्यांनी योग्य ती म्हायती हजर आशिल्ल्यांक दिली.
ह्या वेळार हजर आशिल्ले कांय नगरसेवक, नगरसेविकांनी विचारिल्ल्या प्रस्नांक तांणी जापो दिल्यो.
चित्रगुप्त अर्बन टेक्नॉलॉजीज हि डेटा कंपनी. जी शारी जीण आनी प्रशासनांत क्रांती घडोवन हाडपा खातीर डेटा वापरपाचे लक्ष दिता. कंपनी दृष्टी, ऑडिओ, हेर सेन्सर्स वरवीं विवीध भागांचें निरीक्षण करता. उपरांत मेळिल्ल्या डेटाचें संबंधितांक कृतीयोग्य अंतर्द्दष्टींत रुपांतर करपाचेर लक्ष केंद्रीत करता. हे विशीं नमन पैठणकार हांणी पीपीटी वरवीं म्हायती दिली.
ह्या वेळार मुरगांवचे नगराध्यक्ष गिरिष बोरकार, मुख्याधिकारी सिध्दीविनायक नायक, नगरसेवक दामोदर कासकार, नारायण बोरकार, नगरसेविका देविका आरोलकार, नगरसेविका, तशेंच पालिका अधिकारी आनी हेर हजर आशिल्ले.
चित्रगुप्त अर्बन टेक्नालॉजीजान तयार केल्ल्या अॅपाक लागून खंयची गरजेची म्हायती मेळटा, तिचें काम कशें चलता, हाका लागून शार भागांतल्या विवीध समस्यांची उकल कशी करपाक मेळटली हे विशीं तांणी म्हायती दिली.
ह्या अॅपा वरवीं विवीध डेटा मेळोवपाक मेळटा. कांय वर्सां आदीं एखाद्या सुवातेचीं घरां खंयचे पद्धतीचीं आशिल्लीं, आतां तांचे मदीं कसलो बद जाला आनी खंयचें नूतनीकरण केलां हे विशींची म्हायती पालिकेक मेळपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
