भांगरभूंय | प्रतिनिधी
इस्लामाबाद, खबरां संस्था: खैबर पख्तूनख्वा प्रांतांतल्या उत्तर वझिरीस्तान जिल्ह्यांत लश्करी ताफ्याचेर जाल्ल्या घातकी बॉम्ब हल्ल्याचो आरोप पाकिस्तानान भारताचेर केला. हातूंत १३ सैनीकांक मरण आयलें. भारतान पाकिस्तानाचे आरोप भायर मारल्यात.
२८ जुनाक वझिरीस्तानावेल्या हल्ल्या खातीर भारताक जापसालदार धरपी पाकिस्तानी लश्कराचें अधिकृत विधान आमी पळयलां. आमी हें विधान पुराय तिरस्कारान न्हयकारतात, अशें परराष्ट्र मंत्रालयाचे प्रवक्ते रणधीर जयस्वाल हांणी एक्साचेर पोस्ट करीत सांगलें.
शेनवारा वझिरिस्तानांत एका हल्लेखोरान स्फोटकांनी भरिल्लें वाहन लश्करी ताफ्यांचेर आदळ्ळें. उपरांत व्हड स्फोट जालो. हातूंत १३ पाकिस्तानी सैनीकांक मरण आयलें. जाल्यार १० सैनीक आनी १९ नागरीक जखमी जाले.
खैबर पख्तूनख्वा हांगा तैनात आशिल्ल्या एका पुलीस अधिकार्यान एएफपी वृत्तसंस्थेक सांगलें, स्फोटाच्या नेटान दोन घरांचीं पांखींच पडलीं आनी हातूंत स भुरगीञ जखमी जालीं. पाकिस्तान-तालिबान (टीटीपी) कडेन संबंदीत हाफिज गुल बहादूर गटान ह्या बॉम्बस्फोटाची जापसालदारकी स्वीकारली. खैबर प्रांत हो टीटीपीचो बालेकिल्लो मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
