जगन्नाथ रथयात्रेक जाल्ले खेटाखेटींत तिगांक मरण
भांगरभूंय | प्रतिनिधी
भुवनेश्वर, खबरां संस्था: ओडिशांतल्या पुरीच्या जगन्नाथ रथयात्रे मजगतीं एक व्हड अपघात जालो. आयतारा सकाळीं सुमार ४ वरांचेर गुंडीचा देवळा लागसार भगवान जगन्नाथाच्या नंदीघोष रथा लागसार बरीच गर्दी जावन खेटाखेट जाली. हाचे मजगतीं ३ भाविकांक मरण आयलें. ५० जाण जखमी जाले, तातूंतल्या ६ जाणांची जाणांची भलायकी इबाडली. बसंती साहू (३६), प्रेम कांती मोहंती (७८) आनी प्रभात दास अशीं मरण आयिल्ल्यांचीं नांवां आसात. सगल्यो कुडी पुरी मेडिकल कॉलेजींत दवरल्यात.
रथ पळोवपा खातीर व्हड गर्दी जाली तेन्ना ही घडणूक घडली. हाचे मजगतीं खेटाखेट जाली आनी पडिल्ल्या लोक चिड्डले. जंय खेटाखेट जाली थंय जाय तशे पुलीस वा सुरक्षा दळ तैनात नाशिल्ले, अशें कांय लोक म्हणटात.
भगवान बलभद्र आनी सुभद्रा हांचे रथ पयलींच श्रद्धाबली (अंतिम बिंदू) हांगा पाविल्ले. उपरांत, भगवान जगन्नाथांचो रथ तांचे मावशेचे सुवातेर, गुंडीच्या देवळांत पावलो.
शुक्रारा शेकड्यांनी भावीक पडले दुयेंत
शुक्रारा देवी सुभद्रा रथा भोंवतणी गर्दी वाडिल्ल्यान ६२५ भाविकांची भलायकी इबाडली. प्रशासनाच्या म्हणण्या प्रमाण, ७० जाणांक हॉस्पिटलांत दाखल केले. तांतल्या ९ जाणांची भलायकी हुस्न्याची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
