भांगरभूंय | प्रतिनिधी
पावसांत दर्या, न्हंयो, झरे, वझरे उपाट भरतात. भरती, सुकती केन्ना येतली ती जाणवीकाय आसल्यार दर्या, न्हंयांनी फेरीबोटी, बार्जी बुडपाच्यो घडणुको पयस दवरुंक मेळटल्यो. कॅप्टन ऑफ पोर्टस, न्हंय येरादारी खात्याक तशी शिटकावणी हवामान खातें दिता आसतली. ते शिटकावणेचो अर्थ समजून घेवन फेरीबोटी वयले कामगार, बार्जीच्या धनयांक सादूर रावपाक सांगपाक जाय.
भरती खंय, खंयच्या वेळार येतली हाचो अदमास हवामान खातें कळयता. जिल्लोधिकारी ते न्हंय येरादारी, कॅप्टन ऑफ पोर्टस खात्याक ती माह्यती काल कागदार मेळटाली. तेंच आयज इ मेल, वॉटस अॅपावरवी बेगीन कळूंक येता. चुको आसत, अदमास फाटीं फुडें जायत पूण शिटकावणी मेळटा राजभासेंतल्यानय. इ मेल, वॉटसअॅपार आयिल्ली मेसेज वेळार पळल्यारच लाव मेळूंक येता.
सोंपिल्ल्या सप्तकांत दोन घडणुको घडल्यो तेन्ना उमासेचो तेंप आशिल्लो. अमास लागचे आदीं, उपरांत घडिल्ल्या घडणुकांचो अभ्यास केल्यार, सादूर रावल्यार फुडारांत जावपी व्हड घडणुको आडावंक येतल्यो. दर्या राक्षसी रुप घेतलो, ल्हारांची उंचाय वाडटली, गती वाडून रों रों वारें व्हांवतलें ती म्हायती हवामान खातें दिता. सप्तकांतल्या पांच ते सात दिसांच्या हवामानाची मोलादिक म्हायती अरिश्ट वेवस्थापन खातें, विभागच न्हय सरकारांतल्या म्हत्वाच्या खात्यांक मेळपाची वेवस्था आसतली. मेळिल्ली म्हायती वाचप, वाचप्यां मेरेन अचूक पावोवपाचो वावर दिसाळीं करतात. दिसाळीं वाचून उपाय घेतल्यार फेरीबोटी, व्हडीं, बार्ज येरादारी कांय दीस थांबोवन मालमत्ता वाटावंक येता. कसिनो, भोंवडेकारांक भावपी बोटभोंवडेकारांनी भरतेवेळार दर्यांत, न्हंयेंत वचचें न्हय अशी शिटकावणी दिवपाचो वगत आयला.
आधुनिक फेरीबोटी हाडल्यो तरी भरते वेळार मुखेल करुन पावसांत त्यो व्हांवन वचच्यो ना, बुडच्योना अशें न्हय. मनशान आपल्या गरजे पासत सोंपयल्लो सैम, दोंगुल्ल्यो, न्हंयो, दर्याचेर केल्लीं बांदकामां हवामानांत बदल हाडटा. न्हंयो, दर्यालागिच्या वाठाराचो अभ्यास न्हंय येरादारी खात्याक करचो पडटलो.
उंचेलीं ल्हारां देगेर आपटतलीं हीं शिटकावणी फाटल्या सप्तकांत खरी थारली. एका तेंपार उंच ल्हारां दोनापावला, मिरामार, सुनामीच्या तेंपार फेरीबोटीच्या धक्यार दिसतालीं. कांपाल वॉक वेर अंदूं तीं आनीक उंचायेर गेल्लीं दिसतात. ल्हारांची उंचाय पावस नासतना वॉक वे, वॉक वेर चलतल्यांक भिजयतात. शारांतल्या हेर वाठारांतले आनी न्हंयेकडलें हवामान वेगळें आसता हाचो अणभव चलता भोंवतल्याक कळटा.
बदलपी हवामानाची बारीकसाण घेतल्यार जुलय म्हयन्यांतले पुनवेआदीं, उपरांत दोन तीन दीस जतनाय घेवप बरी हें समजतलें. हवामान खीणाखिणाक बदलता, जून म्हयन्याचो पावस, वारें, ल्हारां जुलै म्हयन्यात आसचींय ना. तांचींय रुपां बदलिल्लीं दिसूंक येतात, केन्ना राकेसावरी, केन्ना थीरपणान व्हांवपी न्हंय, दर्या म्हयनोभर पळेल्यार कळटा. दर्या, न्हंयो वाचूंक शिकपाची ज्येश्ठनीत विज्ञानिकांची, शास्त्रज्ञांची. उमास (न्यू मून), पुनव (फूल मून) क सगले धर्म, जातीचे भाव भयणी पाळो दितात. कांय जाणांक तातूंत मिथक दिसत पूण तें सत, कल्पनेतलें न्हय अणभवातलें.
मनीस, यंत्रां प्रमाण जनावरां, पक्षांकय अमास, पुनव लागता. तांकांय भिरांत दिसता पावसा वाऱ्याची, झाडां पानांचो तांकां आलाशिरो आसता. झाडां, पानां नासल्यार घरां, मोडक्यो, पोरण्यो बिल्डिंगोय पक्षांचीं, जनावरांची घरां जातात. पक्षांचो, जनावरांचो मूळ राबीतो मनशांनी आपल्या खातीर उपेगाक हाडटना तांचे पासतय तजवीज करची पडटा.
न्हंयो, दर्यातली रेंव कितल्या प्रमाणांत काडप, कितलीं व्हडीं, बोटी सोडप तें ठरोवन दिल्लें आसता. रेंवेंचेर, नुस्त्याचेर घाल्ली घुरी न्हंयो, दर्याची खोलाय वाडयता. तेचप्रमाण दर्यांत, न्हंयांत गेल्लो, उडयल्लो कोयर मातयेच्या रुपांत भुंयेवटेन, भुंयेचेर परतून येता. अमास, पुनवे लागसाल्ले, उपरांतचें भरती, सुकतेचें शास्त्र हेर राज्यांतल्यान गोंयांत आयिल्ल्यांक शिकोवपाची गरज आसा. उत्तर, दक्षिणेकडले नागरीक हेर राज्यांनी वतात तशे आमच्याय राज्यांत येतात, कांय नोकरी, कांय धंद्या पासत. तांकां आमचो (गोंयचो) दर्या, आमच्यो न्हंयो समजावन सांगप, मेरीटायम अभ्यासक्रमांतल्यान गरजेचें.
तंत्रीक गिन्यान नाशिल्ले, अणभव नाशिल्लेय न्हंय येरादारी खात्यांत आसल्यार तांकांय प्रशिक्षणावरी गिन्यान दिवचें. गिन्यानाचो दिवो लावपाक ज्येश्ठांनी शिकयलें. ती ज्येश्ठनीत आपणावन, तेंपाप्रमाण कुरपणे घालत बदलून भलायकी सांबाळपी, सैम वाटावपीय आसात तेय गिन्यान दिवंक शकतात. भरते, सुकतेची नेमावळ बदलता व्हय? मनशाचे जिणेचेर ताचे कितले परिणाम जातात? मनीस उत्सवी जातना ताच्याय घाळपणांतल्यान खेटाखेट जाता, रातभर जागरणां जातात, दोळे शिणटात, खेटाखेटींत चिड्डूवप तातूंतल्यान जालां? उपाय सोदूया, बदल करुया आमीच.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
