येरादारी मळार क्रांती घडोवपी गोंय पयलें राज्यः मुख्यमंत्री

भांगरभूंय | प्रतिनिधी

दिवचलः गोंय येरादारी मळार आधुनीक तंत्रगिन्यानाचो उपेग करून गोंय क्रांती घडोवपी राज्य थारतलें. म्हजी बस येवजण शार आनी गांवगिऱ्या वाठारांतल्या प्रवाशांक सवाय आनी परवडी आसतली.
हे येवजणेंत खाजगी बस सेवा आनी सरकारी कदंब सेवांचो योग्य समन्वय करतना डिजिटल क्रांती वरवीं सगल्यांक योग्य सुविधा आनी फायदे मेळटले अशी वेवस्था सरकारान केल्या अशें मुख्यमंत्री डॉ. प्रमोद सावंत हांणी कार्यावळींत उलयतना सांगलें. म्हजी बस येवजणे खाला जायत्या बस धनयांक फाटल्या इंधन सवलतीची थकबाकी वांटपा खातीर आनी वेगवेगळ्या येवजण्यांचो फायदो घेवपा खातीर गोंय येरादारी खात्यान कदंब म्हामंडळा वतीन रवींद्र भवन साखळे हांगा खाशेली कार्यावळ घडोवन हाडली.

ह्या वेळार येरादारी मंत्री मावीन गुदिन्हो, कदंबा म्हामंडळाचे अध्यक्ष उल्हास तुयेकार, संजय गोयल, येरादारी अधिकारी संजय पारवडकार, भालचंद्र सावंत, रोहन कासकार आनी हेर मानेस्त हाजीर आशिल्ले.
खाजगी बस चालकांक 50% विमो येवजण, नवी गाडी घेवपा खातीर १० लाखा रुपया इंधनाचेर तीन रुपया सवलत दिवपाची येवजण आसा. देखून खाजगी बस चालकांक हे येवजणेचो व्हड फायदो जातलो हें निश्चीत. हाचे वांगडाच कदंब बस सेवा आनी खाजगी बस सेवा हांचो योग्य समन्वय करून गोंयांतल्या सगळ्या सुवातींनी म्हजी बस येवजण चालीक लायतले अशें मुख्यमंत्र्यान सांगलें. सुखकर आनी सोयीस्कर येरादारी हो आमचो संकल्प आनी म्हजी बस येवजण हो देशांतलो एक क्रांतीकारी आनी पयलो उपक्रम अशें मुख्यमंत्र्यान जाहीर केलें.

मजगतीं, ह्या वेळार मुख्यमंत्र्यान इंधन अनुदानाचे धनादेश बशीच्या धनयांक तशेंच म्हजी बस येवजणे खातीर मान्यताय पत्र वितरित केलें. ह्या वेळार डिजिटल वेवस्थेचेंय उक्तावण मानेस्तांनी केलें.