भांगरभूंय | प्रतिनिधी
पणजी ः भू-नोंदणी खात्यात वेगवेगळ्या 40 पदां खातीर भरती जातली. तातूंतली 20 पदां फिल्ड सर्वेयर आनी 20 पदां एमटीएस पदां खातीर आसात. सगळी पदां एनएकेएसएचए प्रकल्पा खाला फकत 4 म्हयन्यांच्या कंत्राटी तत्त्वाचेर भरतले. सगल्या पदां खातीर मुलाखती 15 जुलयाक सकाळीं 10.30 वरांचेर पणजेच्या खात्याच्या मुखेल कार्यालयांत जातल्यो.
फिल्ड सर्वेयर पदाचेर म्हयन्याक 32 हजार पगार दितले. हे खातीर एसएससी वा समतुल्य अभ्यासक्रम पुराय केल्लो आसप गरजेचें. हातूंत गणित हो विशय घेतिल्लो आसपाक जाय. वा सिव्हिल इंजिनियरिंगांत डिप्लोमा आसप गरजेचें. तशेंच हातूंत सर्वेक्षण हो विशय घेतिल्लो आसपाक जाय. उमेदवाराक जीएनएसएस उपकरणां वापरपाचो अणभव आसपाक जाय. तशेंच ताचे कडेन 15 वर्सांचो राबितो प्रमाणपत्र आनी कोंकणी भाशेचें गिन्यान आसपाक जाय.
एमटीएस पदा खातीर धावी वा समतुल्य शिक्षण पुराय केल्लें आसप गरजेचें. उमेदवाराक कोंकणी आनी मराठी भाशेचें गिन्यान आसपाक जाय. उमेदवारांनी आपलो अर्ज, फोटो, मूळ कागदपत्रां आनी मूळ प्रमाणपत्र, जल्म प्रमाणपत्र, वळखपत्र, राबितो प्रमाणपत्र आदी कागदपत्रां घेवन मुलाखतीक हाजीर रावचें. सगल्या पदां खातीर पिराय मर्यादा 45 वर्सां आसा.
निवड जाल्ल्या उमेदवाराक कंत्राटाची मुजत वाड मेळपा संबंदी कसलोच हक्क आसचो ना. मुलाखतीक हाजीर रावपा खातीर टीए, डीए दिवचे ना. वयर सांगिल्ले पात्रतायेचे निकश पुराय करपी उमेदवारांनीच मुलाखती खातीर हाजीर रावचे. सगल्या उमेदवारांनी अर्जांत आपलो मोबायल नंबर बरोवचो. कसलेंच कारण दिनासतना कंत्राट काळ पुराय जावचे पयलीं खंयच्याय कर्मचाऱ्याची सेवा बंद करपाचो अधिकार खात्याकडेन आसा अशी म्हायती दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
