भांगरभूंय | प्रतिनिधी
पणजी ः गोंय गृहरक्षक भरती प्रक्रियेंत धावेचें बोगस प्रमाणपत्र सादर करून फटवणूक केल्ल्यान केपे तालुक्यांतल्या दोगां आड पणजी पुलीस स्टेशनांत गुन्यांव नोंद केला. उप कमांडंट (नागरी संरक्षण) एजिल्डा डिसोझा हांचे कागाळीचेर ही कारवाय केल्या.
नोव्हेंबर 2024 त ही घडणूक घडली. दुबावीत शायदा गांवकार (मोरपिर्ला, केपें) आनी अशोक देसाय (फातर्पा, केपें) हांणी गोंय माध्यमीक शिक्षण मंडळाचे (10 वी) बोगस प्रमाणपत्र तयार करून गृहरक्षक पदाचेर भरती करतना सादर केल्ले. हे कागदपत्र गोवा राखीव पुलीस कॅम्प आल्तिने-पणजीच्या कार्यालयांत सादर केल्लें. ह्या कागदपत्रांची बारीकसाणेन चवकशी जाली तेन्ना ते बोगस आशिल्ल्याचें दिसून आयलें.
ह्या प्रकरणांत पणजी पुलिसांनी भारतीय दंड संहिता 2023 च्या कलम 336 (3) आनी 340 खाला गुन्यांव नोंद केला आनी पुलीस उपनिरिक्षक दीपेश शेटकार हांच्या फुडारपणा खाला फुडली चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
