भांगरभूंय | प्रतिनिधी
नवी दिल्ली, खबरां संस्था ः प्रधानमंत्री नरेंद्र मोदी 2 आनी 3 जुलयाक घानाक भेट दितले. प्रधानमंत्री हांची ही पयली द्विपक्षीय घाना भेट आसतली. तीन दशकां उपरांत भारतीय प्रधानमंत्री घानाक भेट दितात. ह्या भेटी वेळार प्रधानमंत्री घानाच्या राष्ट्राध्यक्षां कडेन चर्चा करून घटमूट द्विपक्षीय भागीदारीचो नियाळ घेतले आनी अर्थीक, उर्जा आनी संरक्षण सहकार्य आनी उदरगत सहकार्य भागीदारी वरवीं ती आनीक वाडोवपाचे मार्गांचेर चर्चा करतले.
त्रिनिदाद आनी टोबॅगो प्रजासत्ताकाची प्रधानमंत्री कमला प्रसाद- बिसेसर हांच्या निमंत्रणा प्रमाण प्रधानमंत्री 3 आनी 4 जुलयाक त्रिनिदाद आनी टोबॅगोक अधिकृत भेट दितले. प्रधानमंत्री त्रिनिदाद आनी टोबॅगो संसदेच्या संयुक्त सत्राकूय संबोधित करपाची शक्यताय आसा. प्रधानमंत्री हांची त्रिनिदाद आनी टोबॅगो भेटींतल्यान दोनूय देशां मदल्या बऱ्या आनी इतिहासीक संबंदांक नवी चालना मेळटली.
आपल्या भेटीच्या तिसऱ्या टप्प्यांत अर्जेंटिनाचे राष्ट्राध्यक्ष जेवियर मिलेई हांच्या निमंत्रणा प्रमाण, प्रधानमंत्री 4 आनी 5 जुलयाक अर्जेंटिनाक अधिकृत भेट दितले. ह्या वेळार प्रधानमंत्री अर्जेंटिनाचे राष्ट्राध्यक्ष मिलेई हांचे कडेन द्विपक्षीय चर्चा करतले. संरक्षण, शेतकी, खण, तेल आनी वायू, अक्षय उर्जा, वेपार आनी गुंतवणूक, लोकां मदीं संबंद अशा मुखेल वाठारांनी भारत-आर्जेन्टिना भागीदारी वाडोवपाचे मार्गाचेर दोनूय फुडारी चर्चा करतले.
आपल्या भेटीच्या चवथ्या टप्प्यांत ब्राझीलाचे राष्ट्राध्यक्ष लुईझ इनासियो लुला द सिल्वा हांच्या निमंत्रणा प्रमाण प्रधानमंत्री 5 ते 8 जुलयाक ब्राझीलाक वचून 17व्या ब्रिक्स शिखर सभेंत वांटो घेतले आनी उपरांत तांची राजकी भेट जातली. प्रधानमंत्र्याची ही चवथी ब्राझील भेट आसतली.
ह्या भोंवडेच्या निमाण्या टप्प्यांत नामिबियाचे राष्ट्राध्यक्ष डॉ. नेटुम्बो नंदी-नदाइटवाह हांच्या निमंत्रणा प्रमाण प्रधानमंत्री 9 जुलयाक नामिबियाक भेट दितले. मोदी हांची ही पयली नामिबिया भेट आसतली आनी भारतीय प्रधानमंत्र्यांची तिसरी नामिबिया भेट आसतली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
