‘काँटा लगा’ गर्ल शेफाली जरीवाला अंतरली
भांगरभूंय | प्रतिनिधी
मुंबय, खबरां संस्था ः ‘बिग बॉस 13’ आनी ‘काँटा लगा’ फेम अभिनेत्री, मॉडेल शेफाली जरीवाला (42) काळजाचो आताक आयिल्ल्यान संवसाराक अंतरली.
मेळिल्ले म्हायती प्रमाण, शेफाली मुंबयच्या अंधेरी लोकखंडवाला वाठारांत रावताली. रातच्या 11 वरांचे सुमाराक अचकीत तिचे काळजात दुखपाक लागले उपरांत तिचो घरकान्न पराग त्यागीन तिका लागसारच्या हॉस्पिटलांत व्हेली. पूण थंय उपचारा वेळार तिका मरण आयलें. ‘काँटा लगा गर्ल’ ह्या नांवान लोकप्रिय आशिल्ली शेफालीन अक्षय कुमार आनी सलमान खान हांचे वांगडा ‘मुझसे शादी करोगी’ ह्या सिनेमांतय काम केल्लें.
15 डिसेंबर 1982 दिसा अहमदाबादांत जल्मल्ल्या शेफालीन जायत्या रियलिटी शो आनी फिल्मांनी काम केलां. 2002 त ‘काँटा लगा’ ह्या आल्बमांतलें गीत रिलीज जालें आणि ते बरेच हीट जाल्लें. ह्या गीताक लागून शेफाली जरीवाला हिका रातयां नामना मेळ्ळी. ‘नच बालिये ५’ आनी ‘नच बालिये ७’ हातूंत तिणें वांटो घेतिल्लो. 2019 वर्सा सलमान खानाच्या फामाद रियलिटी शो ‘बिग बॉस 13’ हातूंत तिणें काम केल्लें. हाचे भायर २०१८ वर्सा ‘बेबी कम ऑन’ ह्या वेब मालिकेंतय तिणें मुखेल भुमिका केल्ली. तिच्या नाचाक लागून ती खूब नामनेक पाविल्ली. 2024 वर्सा निमाणी ती ‘शैतानी रश्मे’ ह्या टीव्ही शोंत दिसली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
