भांगरभूंय | प्रतिनिधी
पणजी: उच्च न्यायालयाच्या आदेशा उपरांतूच गोंयच्या टॅक्सीक मिटर बसयल्यात. कांय जाणांनी कितेंय उलोवपाची संवय आसा. ते उलयतात म्हूण हांव तांकां जाप दिवचो ना. पक्षांत शिस्तीन वागचें पडटा हें म्हाका खबर आसा. जबाबदारपदार आसतना हाचो विचार करूंक जाय असो थोमणो येरादारी मंत्री मॉवीन गुदिन्हो हांणी मारलो.
शुक्रारा तांणी आमदार मायकल लोबो हांणी केल्ले टिकेचेर तांचे नांव घेनासतना परती जाप दिली.
गुदिन्हो हांणी म्हणलें, गोंयच्या टॅक्सीक मिटर लावपा विशींची सगलीं कागदपत्रां उपलब्ध आसात. हो निर्णय हांव येरादारी मंत्री जावचे खूब आदींच घेतिल्लो. तशेंच टॅक्सीक मिटर बसोवपा विशीं कांय संघटणांनी उच्च न्यायालयांत धांव घेतिल्ली. उपरांत न्यायालयान मिटर बसोवपाचो आदेश दिल्लो. पूण मिटर बसयले उपरांतूय कोणेच ताचो वापर केलो ना हें सगल्यांकूच खबर आसा. कोण, कित्या खातीर आनी केन्ना उलयता, मुखार कितें उलयतलो हें गोंयच्या लोकांक खबर आसा.
एखाद्या मनशाची उलोवपाची पद्दत कशीय आसली तरी हांव त्या पांवड्यार वचून जाप दिवंक शकना. मंत्र्यान शिस्तीन वागूंक जाय हें म्हाका खबर आसा आनी तेच प्रमाण म्हजी वागणूक आसा. म्हाका कसलोच वाद निर्माण करपाचो ना. म्हज्या म्हायती प्रमाण सरकारान टॅक्सी खातीर खंयचेंच नवें अॅप सुरू केल्लें ना. तें अॅप पयलीं सावनूच आशिल्लें. आतां फक्त 25 लिटर इंधन दिवपाची घोशणा केल्या. टॅक्सी वा येरादारी मळार नव्या तंत्रज्ञानाचो वापर जावंक जाय इतलेंच हांव सांगूंक शकता अशें मॉवीन गुदिन्हो हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
