भांगरभूंय | प्रतिनिधी
पणजी: गोंयच्या स्टार्ट अप धोरणांत आयटी बगर हेर मळा वेल्या स्टार्टअपाचो लेगीत आस्पाव करतले. अशा स्टार्टअपांक लेगीन अनुदान दिवपाचो विचार आशिल्ल्याचें मुख्यमंत्री डॉ. प्रमोद सावंत हांणी सांगलें. संवसारीक एमएसएमई दिसा निमतान पणजेंत आयोजीत केल्ले कार्यावळींत ते उलयताले. ह्या वेळार उद्देग मंत्री मॉवीन गुदिन्हो, सचीव सुनील अंचीपका, संचालक अश्वीन चंद्रू, जीसीसीआयच्यो अध्यक्ष प्रतिमा धोंड, मांगिरीश पै रायकार हाजीर आशिल्ले.
मुख्यमंत्र्यांनी म्हणलें की, गोंयच्या स्टार्टअप धोरणा खाला नवें स्टर्टअप सुरू करप्यांक 10 लाख रुपयांची मजत करतात. हें रीण नासून अनुदान आसा.
आतां मेरेन विवीध स्टार्टअपांक 3.4 कोटी रुपयांचें अनुदान दिलां. गोंयच्या तरणाट्यांनी फक्त नोकऱ्यांच्या फाटल्यान धांवनासतना वेवसाय, स्टार्टअप तयार करून हेर लोकांक नोकऱ्यो दिवच्यो. गोंयांतल्या आयटी मळार 624 पैकीं सुमार 50 टक्के स्टार्टअप बायलो चलयतात. गोंयांतल्या 60 टक्के एमएसएमई सेवा मळा वेल्यो आसात. आतां उत्पादन मळार एमएसएमई सुरू करप गरजेचें आसा.
तांणी म्हणलें, गोंयांत पर्यटन, सरबराय अशा सेवा मळार ल्हान उद्देग, एमएसएमई वा स्टार्टअप सुरू करपा खातीर खूबश्यो संदी आसात. थळाव्यांनी ह्यो संदी घेतल्यो ना जाल्यार भायले लोक घेतले. उपरांत भायल्या लोकांक दोश दिवन उपेग ना. विद्यार्थ्यांनी उद्देजक जावपाचें आसत जाल्यार तांणी म्हाविद्यालयाच्या पयल्या दिसा सावन तयारी करूंक जाय. एमएसएमई वा स्टार्टअप सुरू करपा खातीर सरकार सगली मजत करपाक तयार आसा. हे खातीर आयज एमएसएमई आनी वेवसाय सुविधा केंद्र सुरू केल्यात.
फाटल्या वर्सा 21 हजार कोटींचो वेवसाय
गोंय राज्य ल्हान आसलें तरी हांगासरले एमएसएमई उद्देग वाडत आसात. गोंयांत 70 हजार एमएसएमईची नोंदणी जाल्या. हे वरवीं फाटल्या वर्सा सुमार 21 हजार कोटी रुपयांचो वेवसाय जाला. गोंयांतल्या विवीध बँक, वित्तीय संस्था आनी व्हड उद्देगांनी एमएसएमईंक मजत आनी मार्गदर्शन करूंक जाय अशें मुख्यमंत्री डॉ. प्रमोद सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
