भांगरभूंय | प्रतिनिधी
वाचन म्हणल्यार ज्ञान, समृद्धी, कल्पनाशक्ती जागृत करपाची निसण. वाचल्यार वाचतलो, हें वाक्य शंबर टक्के खरें. जरी आमचे कडेन कसली वखदाची बाटली आसा आनी तें वखद घेवचे पयली आमी ते बाटलेर बरयिल्ली तारीख, नेम वाचता आनी मागीर ती घेता. हें वाच्चें पडटा. ताचे वयल्यान कळटा की वाचन दरेकाच्या जिवनाक खूब म्हत्वाचें. जशें अर्धकुटें ज्ञान हें घातक म्हणटात, तें भरपा खातीर आमकां वाचन करप खूब गरजेचें. जर आमी ल्हानपणाच्यान वाचपाची सवय लायली जाल्यार आमची बुद्धी गिन्यानान भरुन येता. चड करुन आमका हाचो फायदो अभ्यासा खातीर जाता. आमका एका जाग्यार बसपाची आनी मन शांत दवरपाची संवय लागता. वाचन मनशाक जागृत करता. ते भायर कितें घडटा आनी
कशें तरेन भायर वावुरपाचें हें आमकां वाचन करून कळटा. आमच्या मुखार खुबशे प्रतिभावंत लोक आसा. सावित्रीबाई फुले, मृदुला सिन्हा, रघुनाथ माशेलकार, अनिल काकोडकार, बाळकृष्ण भगवंत
बोरकार.
वाचनाची आवड लावपाक आमकां पयलीं वाचन हें कितें तें जाणून घेवपाक जाय. प्रत्येक आवय -बापायन वाचप घराक वेळांत वेळ काडून येवपाक जाय. कसल्या विशयांचीं पुस्तकां आसात हें पळोवपाक जाय. भुरग्यां मदीं वाचनाची आवड जागृत करपा खातीर तांणी एक पुस्तक घेवन वाचून तातूंतली म्हायती भुरग्यांक सांगपाक जाय, पुस्तक वाचत जाल्यार आमकां सगल्या विशयाच्या प्रस्नांच्यो जापो मेळटात, हे जेन्ना तांकां कळटलें तेन्नाच तांकां पुस्तक वाचपाची आवड आनी गोडी लागतली.
आयच्या भुरग्यांक संगणका विशीं म्हायती घेवपाची चड आवड आसा. इतिहास, प्रवास वर्णन, कादंबरी, सामान्य ज्ञान, भुगोल, विज्ञान, तंत्रज्ञान, मोबायल, गाडी ह्या विशी वाचपाक आवडटा. पुस्तकांचो प्रसार करपाक आमी साबार उपक्रम चालीक लायतात.
आमी पुस्तक प्रदर्शनां दवरतात. तशींच नवीं पुस्तकां गंथ्रालयान येतात तेन्ना ती लोकां खातीर मांडून दवरतात.
भुरग्यांक वाचपाक खातीर आमच्या ग्रंथालयान विनोदी काणयो, नाटक, आपउलोवप, विज्ञान- तंत्रज्ञाना विशीं, फुलां, फळां, पशू, पक्षी, जनावरां, कविता, नाटक, निबंध, सुविचार, ओपारी, म्हणीसागर, सामान्य ज्ञान अशी चार भाशांतलीं पुस्तकां आसात. कोंकणी, मराठी, हिंदी आनी इंग्लीश. आयचीं भुरगीं सगल्या तरेचीं पुस्तकां वाचतात. पंचतंत्र, तंत्रज्ञान, विनोदी कथा, कादंबरी, नाटक, कविता, आजकाल भुरग्यांक इंटरनेट विशीं चड ज्ञान आसा.
वाचन संस्कृताय तिगून उरल्या अशें म्हाका तरी दिसता. वाचन संस्कृती घडोवपाचें काम आमी सगल्यांनी मेळून करपाक जाय. वाचन ना जाल्यार आमी अर्धकुटे, वाचन आसल्यार आमी ज्ञानी. वाचन खंयच्याय रूपान करपाक जाता. पुस्तक, वर्तमानपत्र पुरवणी, नेमाळीं, मोबायल पसून. आमच्या वाचप घराचे 10,042 वांगडी आसात. कादंबरी, कोंकणी, मराठी, हिंदी, इंग्लीश भाशेची सामान्यज्ञान, व्हडल्यांची आनी भुरग्याची नेमाळीं, नाटक, कविता, कथा, निबंध, म्हणी, इतिहासाची, भूगोलाची, विज्ञानाची, तंत्रज्ञानाची पुस्तकां लोक चड व्हरतात.
भुरग्यांक वाचनाची गोडी लावपाक जाय जाल्यार तीन, चार वर्सा पिरायेचेर
तांकां रंगबेरंगी पुस्तकांची चित्रां दाखोवपाक लागपाक जाय. तातूंतली चित्रा कशीं आसात ंहे तांकां सांगपाक लावपाक जाय. अक्षरां बरोवपाक शिकोवंक जाय. पुस्तकांत भरपूर ज्ञान आसता आनी ते आमी कशे तरेन घेवपाचें तर पुस्तक वाचून हे तांकां सांगपाक जाय. दर वाडदिसांक एक पुस्तक तांकां दिवपाक जाय. ताकां आवडटा तसलीं पुस्तकां हाडून दिवपाक जाय.
विशाल खांडेपारकार
98504 65365
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
