भांगरभूंय | प्रतिनिधी
गोंयच्या कोयराचेर जातलें ट्रॅकिंग
पणजी: सरकारान कोयर वेवस्थापना खातीर गोंयभर बऱ्या दर्ज्याच्यो सुविधा उपलब्ध करून दिल्यात. पूण तांचो योग्य वापर जायनाशिल्ल्याचें दिसून आयलां. विशिश्ट श्रेणींतलो कोयर थारावन दिल्ल्या कोयर वेवस्थापन प्रकल्पांत उडोवपाचो नेम आसा. अशें आसलें तरी ह्या नेमाक पाळो दिनात. कोयराचेर नदर दवरपा खातीर गोंयांत निर्माण जावपी विवीध श्रेणींतल्या कोयराचें ट्रॅकिंग करतले. नेमांची अंमलबजावणी करिनाशिल्ल्यांचेर खर कारवाय करतले अशी शिटकावणी मुख्यमंत्री डॉ. प्रमोद सावंत हांणी दिली.
शुक्रारा पत्रकारां कडेन उलयतना तांणी सांगलें, गोंयांतल्या कोयर वेवस्थापनाचो नियाळ घेवपा खातीर हालींच गोंय घनकोयर वेवस्थापन म्हामंडळाची बसका घेतली. बसकेंत म्हामंडळाच्या अधिकाऱ्यां सयत नगरपालिका, पंचायत, उद्देग आनी हेर मळा वेले भागधारक हाजीर आशिल्ले. बसकेंत कोयरा विशीं धोरणात्मक निर्णय घेवपाचें थारलें. ते प्रमाण गोंयांतल्या विवीध श्रेणीतल्या कोयराचें ट्रॅकिंग करपाचें थारलें. घातक कोयराचो विलो लावपा खातीर पिसुर्ल्यां विशेश प्रकल्प उबारला.
गोंयांत सद्या घातक कोयर निर्माण करपी 350 आस्थापनां आसात. पूण हातूंतलीं फक्त 50 आस्थापनांच पिसुर्ल्यां कोयर वेवस्थापनांत कोयर उडयतात. उरिल्लीं आस्थापनां असो कोयर आमी भायले कंपनीक दीत आशिल्ल्याचें सांगतात. पूण हाचे मुखार अशें खपोवन घेवचे नात. घातक कोयर पिसुर्ल्यां प्रकल्पांतूच उडोवंक जाय. उरिल्ले श्रेणींतलो कोयर लेगीत थारवन दिल्ले सुवातेंतूच उडोवंक जाय. हे विशीं गोंयच्या हॉस्पिटलांची कामगिरी बरी आसा. गोंयांत तयार जावपी 99 टक्के कोयर जैव वैजकी कोयर प्रकल्पांत वता.
म्हयन्या भितर परतून बसका
मेळिल्ले म्हायती प्रमाण बसकेंत हाजीर आशिल्ल्या भागधारकां कडल्यान गोंय 100 टक्के नितळ आनी सुंदर दवरपा खातीर विवीध सुचोवणी, मतां विचारांत घेतलीं. तशेंच गोंयचें कोयर वेवस्थापन सुदारपा खातीर उपाय येवजण्यो सुचोवपाचें आवाहन केलें. भागधारकां कडल्यान फुडल्या आठ दिसांत उपाय येवजण घेतले. हाचेर विचार करून फुडलें धोरण थारावपा खातीर एका म्हयन्या भितर परतून बसका घेवपाचे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
