भांगरभूंय | प्रतिनिधी
म्हापशें : कोलवाळ बंदणींत गांजो बॉल शेंवटून केल्ले ड्रग्स तस्करींतलो कैदी दुबावीत मंथन राजू च्यारी (25. रा. घाटेश्वरनगर, खोर्ली) हाका कोलवाळ पुलिसांनी अटक केली. कैदी मंथन होच अटक केल्ले टोळये वरवीं बंदखणींत ड्रग्साची तस्करी करतालो, हें चवकशेंतल्यान उक्तें जालां. गणेशपुरी – म्हापश्यां जाल्ल्या अहमद रेवडी खून प्रकरणांत अटक जायत सावन कैदी मंथन हो फाटलें वर्सभर बंदखणींत आसा.
ह्या प्रकरणांत पुलिसांनी अटक केल्लो गौतम तलवार (24, अन्साभाट म्हापशें), सॅम्युएल पुजारी (24. अन्साभाट म्हापशें) आनी जाफर मुल्ला (24. गंगानगर खोर्ली म्हापशें) ह्या तिगांची खोलायेन चवकशी केले उपरांत तांणी हे ड्रग्स तस्करींत कैदी मंथन च्यारी हाचो आस्पाव आशिल्ल्याचें उक्तें केल्लें. ते प्रमाण शुक्रारा 27 जूनाक पुलिसांनी न्यायालयाचे परवानगेन कैदी मंथन च्यारीक बंदखणींतल्यान ताब्यांत घेवन अटक केली. सांजे वेळार म्हापशें न्यायालयान दुबाविताक चार दीस पुलीस कोठडेंत दवरपाचो आदेश दिलो.
मजगतीं, ही घडणूक 14 जूनाक उजवाडाक आयिल्ली. कोलवाळ बंदखणींतल्या वॉच टॉवर नं. 3 चेर ड्युटी करपा खातीर चडटना आयआरबी पुलिशेचे नदरेक हे बॉल पडले आनी ड्रग्स तस्करी उजवाडाक आयिल्ली. 15 जूनाक बंदखण अधिकाऱ्यांचे म्हायती उपरांत कोलवाळ पुलिसांनी गुन्यांव नोंद करून सात बॉलांनी आशिल्लो 1 लाख 40 हजार रुपया मोलाचो 1.397 कील गांजो जप्त केल्लो. ते उपरांत वाठारांतल्या सीसीटीव्ही फुटेज आनी आधुनीक तंत्रज्ञानाच्या माध्यमांतल्यान दुबाविताचो सोद घेवन बुधवारा 25 जूनाक फांतोडेर दुबावीत गौतम, सॅम्युएल आनी जाफर ह्या तिगां सयत एका 16 वर्सा पिरायेच्या तरणाट्याक धरलो. उपरांत तिनूय दुबावितांक अटक केली जाल्यार नेण्ट्या दुबाविताक बाल न्याय मंडळाचे सुवादीन दिल्लो.
कैदी मंथन च्यारीन वयल्या दुबावितांक फोना वयल्यान संपर्क करून बंदखणींत गांज्याची पुरवण करपाक सांगिल्लें. एका म्हयन्यां आदीं दुबावितांनी अशेच तरेन गांज्याचे बॉल शेंवटून गांजो बंदखणींत पावयल्लो. घडणुके दिसा झाडाक दोरी बांदून दुबावीत बंदखणीचे राखणे वण्टीचेर चडले आनी थंयच्यान गांजो गुंठलायल्ले प्लास्टिकाचे बॉल तांणी शेंवटिले. मात वाऱ्या पावसाक लागून ते भितर पडनासतना दोन राखणे वण्टीचे मदीं पडिल्ले. फांतोडेर 4 वरांच्या सुमाराक दुबावितांनी हे गांजो बॉल शेंवटिल्ले. फांतोडेर 5.30 वरांच्या सुमाराक कैदी मंथन च्यारी हो आपल्या अंडरट्रायल विभागाच्या भायर आयलो आनी गांज्याचे बॉल सोदपाक लागलो. अर्दवर सुमार ताणें ते सोदले, मात ताका कांयच मेळूंक ना, हे खातीर तो परतून गेलो. उपरांत सकाळी बंदखण सुरक्षा यंत्रणेक हो गंजा सांपडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
