भांगरभूंय | प्रतिनिधी
पणजी : गोविंद गावडे हांचें मंत्रीपद तशेंच कला अकादमीचें अध्यक्षपद काडून घेतले उपरांत आतां मुख्यमंत्री डॉ. प्रमोद सावंत हांची कला अकादमीच्या अध्यक्षपदाचेर नेमणूक जाल्या. कला आनी संस्कृती खात्याचे संचालक सगुण वेळीप हांणी अध्यक्षांचे नेमणुकेचो आदेश जारी केला.
कला आनी संस्कृती खात्याचे मंत्री आशिल्ले गोविंद गावडे हांचे कडेन खूब तेंप अध्यक्षपद आशिल्लें. मंत्रीपद गेल्या उपरांत तांचें अध्यक्षपद लेगीत गेलें. फाटलीं दोन सप्तकां कला अकादमीचें अध्यक्षपद रितें आशिल्लें. कला अकादमीचें कामकाज सुरळीत चलपा खातीर अध्यक्षाची नेमणूक बेगिनात बेगीन करपाची मागणी कला राखण मांडान केल्ली.
कला अकादमीचेर चड करून राजकी व्यक्तीची नेमणूक करिनासतना कलाकार वा कलेच्या जाणकाराची नेमणूक करची, अशी तांची मागणी आशिल्ली. तांची ही मागणी काय मान्य जावंक ना. कला अकादमीच्या दीनानाथ मंगेशकार सभाघरांत सेगीत कार्यावळी जायत आसतात. हाका लागून पुराय काळ अध्यक्षाची बेगिनात बेगीन नेमणूक करची अशी मागणी लेगीत कलाकारांनी केल्ली. फोंडेंचें राजीव गांधी कला मंदीर तशेंच काणकोण रवींद्र भवनाचेर लेगीत बेगिनात बेगीन अध्यक्षाची नेमणूक करची अशी मागणी कला राखण मांडान केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
